Fitz > 運動 Sports > 跑步 Running > [國人競速計劃] 破中國紀錄 獎你100萬人民幣

中國田徑協會與特步公佈,攜手設立「百萬巨獎」,鼓勵運動員挑戰中國馬拉松紀錄。成功挑戰,無論男女子運動員,都可獲得100萬奬金,每突破一秒亦有額外一萬。

中國田徑協會副主席、特步集團主席丁水波直言,佢係眼見日本馬拉松跑手跑到2:10可以多過100人,希望用金錢激勵中國跑手,以求更多中國跑手進軍2020東京奧運馬拉松。截至12月中,只有5名中國運動員達到2:11嘅奧運門檻。(不過其實每個國家最多只可派3名運動員參加奧運)

現時中國馬拉松紀錄:

  • 男子: 2小時08分16秒,任龍雲,2007年北京國際馬拉松
  • 女子: 2小時19分39秒,孫英傑,2003年北京馬拉松

有錢乜都得?

用錢係咪真係可以創造成績? 相信大家都有一個答案。筆者只係想提一提,中國嘅足球運動使得少錢咩? 2018年,中國超級聯賽嘅球員薪酬,係繼英超、西甲、意甲、德甲及法甲世界五大聯賽之後,使得最多嘅聯賽。總薪酬開支超過40億港幣,平均每位球員年薪高達820萬港幣。國內聯賽使咁多錢,咁國家隊嘅成績呢? FIFA世界排名,現時係76位,亞洲最高排名係日本 (28名) 及南韓 (40名)。

講返馬拉松運動,當丁主席話受到日本成績「激勵」,佢又明唔明白日本馬拉松之所以成功,究竟係咩原因呢? 人哋由小學開始培養運動習慣,再於中學大學推廣跑步運動。全國上下所付出嘅,絕不止係金錢 (就算係都肯定唔只100萬),國民仲要付出時間、決心,以及國民嘅質素。當一個民族唔重視體育精神,比賽出術已經視作等閒,就算有個別運動員為咗呢100萬獎金成功打破中國紀錄,又點可以同日本百人跑進2:10呢項成就相比?

我哋呢啲真.香港人或者仲未好了解國情,都係呢位國內網民睇得更透切:

仲有一個問題,香港跑手算唔算中國人? 破咗紀錄有無錢收?

資料: 騰訊體育