[地球最快父子] 60歲爸爸跑出2:27的秘訣

由

2020-05-12

Fitz > 運動 Sports > 跑步 Running > [地球最快父子] 60歲爸爸跑出2:27的秘訣

去年10月嘅德國法蘭克福馬拉松，愛爾蘭嘅 Tommy 同 Eoin Hughes 父子，分別以2:27:52同2:31:30完走，兩人時間加埋係4:59:22，成為「世上最快父子合計完成馬拉松時間」。

今年1月踏入60歲嘅爸爸 Tommy Hughes，絕非泛泛之輩，佢喺1992年曾經代表愛爾蘭出戰巴塞隆拿奧運，參加男子馬拉松，每10年嘅個人最佳時間 (PR)，維持喺2:30以內:

Tommy 最近分享佢嘅跑步心法，指無論在體能練訓，以至心態準備，都要兼顧得到。

量力而為

高手都有極限，在訓練以至比賽，都要了解自己能力，要量力而為。Tommy 話佢喺20歲年代，試過將訓練量每周提高至140英里 (約225km)，點知令身體多處受傷得不償失，最後要減少跑量先可以回升成績。

所以 Tommy 日常練跑，都以「四分之三」配速為練習速度。但每次維持喺10公里以下嘅距離，以求減少受傷。

不過，日常減少練跑距離，並唔代表 Tommy 跑得少。Tommy 堅持寓賽於操，佢話如果每次比賽都盡力跑，以達到訓練目標。所以，佢幾乎每個周末都會參加 Parkrun 或者屋企附近嘅路賽，以維持狀態。

而好多時佢跑完中短途比賽之後，亦會加操跑多課。佢話咁樣可以令自己適應疲勞嘅感覺，呈現跑馬拉松嘅狀況。

超過40年嘅跑步歷程，Tommy 話佢會持續改變佢嘅訓練方式，以求不斷突破。以前佢唔鍾意做重訓，但十幾年前亦因應體能下滑，而逼住去健身室; 又例如佢相信食物嘅幫助，呢兩年比賽前會飲紅菜頭汁。

此外，佢嘅跑姿亦有改變，而家會以小步幅為主。去年德國法蘭克福馬拉松，佢平均步幅係每分鐘199步，Tommy 相信小步幅有助於減少傷患。

了解自己實力，對準目標訓練。Tommy 話佢廿幾歲已決定成為馬拉松跑手，所以就算中途有好多機會參加其他比賽，佢亦選擇放棄，為嘅係可以更集中精神同時間，去為馬拉松賽事準備。

Tommy 坦言，從無寄望有日可以跑得快過 Eliud Kipchoge，不過佢相信自己可以喺超過60歲之齡，仍然跑入2:27。

只要相信自己，凡事有可能。