前言
話說長跑初哥抱住人抽我又抽嘅心態，好幸運咁抽中咗2019年嘅東京馬拉松，於是就打算提早一試初馬 Sub-3 嘅願望。可惜事與願遺，受傷、過度訓練、失溫……甚至乎「斷片」，最後以最少步行咗10km嘅表現去完成我嘅初馬，不甘心，卻又沒齒難忘!
不過一次失敗並不算甚麼，只是在為成功做好準備；而我又再次得到幸運之神嘅眷顧，抽中咗2019年嘅大阪馬拉松，於是就決定再一次去挑戰一下自己!
賽前準備
經過東馬嘅教訓，今次嘅賽前練習我都盡量目標為本，以唔受傷、唔過度訓練為大前提。雖然去到訓練嘅中後段都始終開始出現咗一啲問題，肌肉腫脹加上力不從心，最後仲病埋；但好彩跳過一兩課練習之後，總算可以及時調整，喺出發前重回比賽狀態。
除咗訓練之外，今次喺飲食同休息方面都有多加留意。由於我本身好容易水腫，早喺正式課表開始嘅時候，就已經盡量戒掉凍飲；而最愛嘅啤酒都減得七七八八，為嘅就係可以喺每一課之後更快回復。而上班一族喺休息方面好難控制得好好，我唯有從其他地方入手，善用按摩槍同拉筋就係其中最有效嘅方法。
特別想講一講嘅係賽前嘅加碳。
由於我本身比較容易吸收，上次東馬加碳加到個人肥咗成個碼，今次都唔敢食得太進取，盡量以少食多餐為主，只係去到比賽前一日先瘋狂加碳，效果睇嚟都唔錯，起碼無變咗個肥仔。
目標
終於進入戲肉，就先講講賽前目標。雖然我成日話無因為初馬未能 Sub-3 而耿耿於懷，但初馬大炒唔多唔少為我帶嚟一啲陰影。教練都好體諒我，比我定一個唔太進取嘅目標，其實定位同初馬一樣，開住255 嘅 pacing，最低限度都要 Sub-3 而回!
比賽日
有著東馬嘅經驗，由於同樣都係被編去B區起步，以為可以慢慢上線再作熱身，賽前仲以「經驗跑手」嘅姿態同女朋友講話如果有必要可以坐喺地上面等起跑，無謂浪費不必要嘅氣力。
點知原來大錯特錯!
東馬嘅時候，我用咗43s就可以經過起步點，而且起步後基本上係暢通無阻，跑得非常輕鬆，只係之後嘅事我唔想再提喇……
但今次阪馬完全係兩個世界!
九點正大會準時鳴槍，但由於人多路窄，我用咗足足 4:15 先可以經過起點，不過無所謂啦，又唔係爭名次，反正最後都係睇個人時間，跑好自己就得啦! 點知阪馬嘅擠迫程度，係會令到你根本跑都跑唔到! 簡單啲講，我原本嘅目標配速大嘅係 4’10” 左右，但起跑之後我基本上係連 5’00” 都跑唔到……
講真，嗰刻我真係有一秒鐘諗過放棄，但好彩我即刻清醒過來!
跟住我就努力喺人群中左穿右插，靠邊跑有時係一個好方法，但係當日人實在大多，簡單嘅跑兩邊並唔能夠突圍而出，我經常要跳上馬路中央嘅路跑兩步再跳返落嚟，再跳上去跑兩步又再跳返落嚟；有時情況好啲唔需要跳上跳落，但係要偏離行道跑出雪糕筒外，被工作人員趕返入去又偷偷再跑出去；幾經辛苦，總算係成功逃離人堆，可以正式開始餘下嘅馬拉松比賽。
就係咁，好快又好慢咁過咗頭2km喇!當中經過啲乜、見到啲乜，其實真係唔太記得喇；只係記得好多人，真係好多人!
過咗2km，心算一向唔錯嘅我今次都唔敢計下我慢咗幾多，只係忽然唔知邊度走出嚟嘅勇氣，叫我順住感覺跑；雖然每公里我都有象徵式咁望一望錶，首5km當然係繼續落後，但係當時我都叫自己唔好理配速同時間，因為一諗到早段慢咗咁多就好容易嚇死自己! 一直去到 10km，熟悉嘅數字終於重現眼前，原來喺不經不覺間我已經差唔多追返晒初初失去咗嘅時間! 呢一刻，我確實有諗過繼續順住感覺走，好可能可以做出一個意想不到嘅時間；但我選擇咗保守地稍稍減慢速度，用返目標配速去跑。
由10km去到大概 32-33km，雖然係跑得好穩陣、好輕鬆，但我反而好享受10km之前嗰種自由奔放嘅感覺；唔係話要一味亂衝，但嗰種感真係好好，其實我當時係有信心就咁一直走到尾的，但可能唔多唔少都有東馬嘅陰影浮現喺我腦海之中，最後唯有跑得保守一啲……不過，下次我一定要試吓咁樣挑戰一下先得!
不過咁，喺呢段路上面，其實並無想像中咁漫長。日本嘅市民打氣團確係唔講得笑，男女老幼都非常落力，如果你有比反應佢，佢會比返更加大嘅鼓勵你，絕對係其中一樣非常有效嘅補給!
>
呢個時候係機會講下阪馬條新路線。
初初公佈時人人都以為無咗尾段上橋一定會比以往好跑，但仔細一睇原來都唔係容易。除咗29km有一次上斜之外，基本上32-35km都係上上落落，加上體力開始有所消耗，所以真係30km打後先見真章!
我當然都唔會例外，經過一番上上落落之後，大脾開始有啲感覺；當然，如果要死頂返終點，我都仲係有啲信心嘅……不過呢個時候朋友賽前嘅一句話忽然喺我腦海入面湧出嚟!
「唔好咁老定呀! 我上次都以為我一定 PB……」
又再一次加上初馬嘅陰影，我作出咗一個賽後我認為十分懦弱嘅決定 — 減速!
於是乎由35km左右開始，一直去到大概40km，我都盡量用一個唔太需要用力嘅速度去跑，不過諷刺嘅係我跑得一啲都唔舒服，仲有啲辛苦添……而且，呢一段路係我跑得最唔開心嘅一段!
唔開心嘅時間總係好似過得特別慢! 幾經辛苦，終於跑到最後2km，望一望錶，我知道我終於可以「報仇」喇! 最後呢段路雖然又轉彎又上斜，但睇返啲相，雖然係跑得辛苦，但我真係由個心入面笑咗出嚟!
後記
賽後，同女朋友講開未來目標，其實我一早已經幫自己定咗短期同長期目標㗎喇，但點都估唔到佢講出嘅嘅數字，係一個我諗到未諗過嘅數字；係鼓勵又好，係高估都好，確實令我有啲意外。但諗深一層，三年前初初真正接觸長跑嘅時候，我又點會諗到我會有跑馬拉松呢一日吖!
本名 Jeff，接觸長跑幾年，係初哥中嘅初哥，鍾意除衫跑步，其實係因為想曬黑啲！唔鍾意比賽，但係好鍾意練習！一心想試下一個中年大叔幾十歲人先開始接觸跑步，究竟可以跑到有幾遠？
