Fitz > 運動 Sports > 跑步 Running > 好好聽嘅街馬

街馬跑完四日啦,我Karena個fb仲係俾啲玩野造型洗緊版,證明大家都真係好回味嗰日個氣氛。其實除咗大家眼睇到嘅之外,大家記唔記得嗰日聽到嘅聲音?

平時比賽,渣馬又好,UNICEF 都好,聽到嘅通常都係啦啦隊叫「加油」「撐住」之類,同埋一大堆打氣pong pong 捧。當然啦,跑到身水身汗、上氣唔接下氣時,簡單一句「加油」已經俾到跑手好大嘅力量去完成比賽。

而街馬嗰日,我聽到唔單止有加油嘅說話,仲有超多驚喜!

你試過跑跑下會聽到鋼琴聲未?唔係電子琴,係一大部鋼琴放係路中心!後現代得嚟又有品味,我buy!

好好聽嘅街馬_04靜態嘅有,動態嘅都有!途經一個公園仔,裡面有非洲鼓嘅聲!仲一邊打氣一邊跳舞!

街馬 九龍東

去到行人隧道口,已經聽到裡面有人唱歌!好想一齊唱呀!街馬 九龍東咁熱鬧,點少得舞獅呢?鼓聲震到連對面街都聽到!不過佢好似唔係好夠位郁咁,哈哈。街馬 九龍東就算跑到上觀塘繞道,雖然啦啦隊人數明顯少咗,大會都好細心咁係每個厘數牌度放個喇叭仔播歌。(我嗰段路抽根。好彩聽到隻彈珠人有得笑下,唔係都幾難捱番終點。)

主辦單位有冇heart,跑手其實真係好容易感受到。今次真係玩得好開心,希望街馬主辦單位,可以keep住個質素做落去!

 圖片來源:Runourcity facebook 專頁

更多:
Fitz跑步文章
為咗加碳,你可以食到幾盡?
筋疲力盡的叮噹@街馬


文章為作者意見,不代表Fitz立場。