帶腦麻痺囝囝完成154場長跑賽 台灣小比媽媽: 跑得一場得一場

台灣單親媽媽陳嘉齡，日前挑戰45公里「南橫超級馬拉松」，佢以特製手推車，推住患有極重度腦性麻痺嘅囝囝「小比」，用咗大約10小時衝過終點，完成3年來嘅第154場賽事。

愛可以忘卻傷痛

今年20歲嘅「小比」同媽媽陳嘉齡，係台灣相當有名嘅長跑組合，佢哋除咗係長跑賽事常客，亦經常受邀上電台勵志節目分享。

小比嘅殘障並非天生，佢六個月大時注射疫苗後出現副作用，引發腦性麻痺，造成極重度智能障礙及中度肢體殘障，唔會行亦唔會講說話。呢個時候，小比嘅爸爸仲因為接受唔到事實而拋妻棄子，剩番陳嘉齡同小比相依為命。

陳嘉齡話，因為小比日常生活需要高度照顧，亦經常要出入醫院，所以呢20年來，陳嘉齡都只能夠做兼顧或臨時工度日，生活拮据。心力內瘁之下，陳嘉齡仲患上抑鬱症，亦試過食安眠藥自殺。直到2017年，受朋友邀請跑咗佢第一場10公里賽。從來無運動習慣嘅佢，話嗰次跑得相當辛苦，雙腳起泡，對腳痛到唔屬於自己一樣。不過因為咁而佢同小比受人關注，開始有人邀請佢哋兩母子參加賽事。

第二場比賽佢哋去咗高雄嘅旗津區跑3公里，當日因為天氣好，又唔太熱，小比坐上手推車表現得相當興奮。陳嘉齡發現推住小比跑步時，小比會掛住開心嘅笑容，於是陳嘉齡雖然跑得辛苦，但仍不斷參加長跑賽事。三年以來，佢兩母子一共參加超過150場比賽，差唔多走遍台灣全境。

因為長期彎腰推住小比，陳嘉齡嘅腰部有勞損跡象。唔少朋友都勸佢減少參加賽事，保養好身子。不過陳嘉齡解釋話:

「醫生話小比個病令佢嘅壽命最多得廿幾歲，所以今日我哋跑完一賽，都唔知可唔可以跑下一場。我希望喺佢離開之前，大家可以創造更多美好回憶。」

陳嘉齡完成呢場超馬之後，將計劃今年秋天同小比去挑戰玉山及嘉明湖等地方。

小比的跑旅雜記 Facebook 專頁

資料: 聯合新聞網、台灣蘋果日報