[康宏圖騰跑] 報名費與捐款朝三暮四現代版?

由

2018-05-11

Fitz > 運動 Sports > 跑步 Running > [康宏圖騰跑] 報名費與捐款朝三暮四現代版?

同大家講個成語故事先:

話說有人養咗一班馬騮，每隻馬騮每日有七份食物，朝早三份，夜晚四份。有日馬騮仔覺得唔夠食，就向主人要求更多食物。主人話：「咁朝早每隻馬騮就有四份食物，夜晚就畀三份啦。」結果，馬騮諗咗陣，覺得好似多咗，就接受咗主人嘅提議。

呢個成語叫「朝三暮四」，意思係指呃呃騙騙嘅技倆。呢個星期，圖騰跑開始報名，有網友就向 Fitz 及網上群組廣發下圖：

個人組及四人隊際，計晒報名費同捐款，57公里比舊年就加咗100蚊，16公里就加咗50蚊。但細心留意，會發現基本捐款每人由500蚊減至250蚊。

即係話，大家總共畀嘅錢相隔一年，並唔算加得多，但其實報名費就大幅增加，而捐款就大幅減少。如果報名費同捐款都自己搞掂嘅話，當然無乜問題。問題係如果諗住搵人贊助捐款，咁就無疑要畀多好多報名費。

至於其餘山賽係點? 苗圃挑戰12小時已定於6月11日報名，不過網頁仲未有細則；另一個重要山賽雷利衛徑長征，亦未有消息。

而已經開始登記嘅樂施毅行者，無論報名費同捐款，都同舊年一樣，無任何改動。

百物騰貴，升斗市民都要頂硬上啦。