Fitz > 運動 Sports > 跑步 Running > 我思故我在跑
世界上你一定要去鎅的人是誰? 仲洗問,一定係你自己!

什麼時候你會思考人生的意義,我是誰? 為什麼我會在這裡? 乜嘢處境你會感到前路茫茫,缺乏方向,生命坎坷? 兩個可能:

A. 俾方丈爆完樽
B. 你入咗山界玩越野跑

在山徑跑到筋疲力竭,一人之境在四方山頭爬上那條45度的斜坡時,力已竭、gel已盡,但路未完,意識模糊,我隱約見到前面像隧道有一點光,思緒紛陳。Yes,就在那裡,我開始思考和有以下發現:

1. 報 100K 山賽同結婚一樣,報果時興奮,報完就後悔
2. 抽筋就好似失戀咁,時間可以沖淡一切

係有啲似,但唔係我嚟架  圖: 新浪體育

3. 有乜嘢事情會危險過去爬自殺崖,係上 Cam2 /Action Panda
4. 什麼事情比4人限聚但可以8人同枱食飯更不合邏輯,就係你腳的數量同你擁有跑鞋的數量
5. 當你疲累至極,飢寒交迫,鬥志冇貨時,你最想見到邊個人? 當然係大帽山女神,蓮姐!

見到蓮姐,即係見到希望 圖: 星島網

6. 師兄同你講轉個彎就到,同對網上情緣一樣,千萬不要付出真感情
7. 你最有創意的時候: 說服自己唔出去跑步
8. 你最糾結的時候: 操長課,尿袋、拖鞋、寶礦力,三樣東西你只能帶一樣入背包
9. 你最黑仔的時候: 著咗 最貴 / 最新 果條 2XU tight 至知要爆林
10. 你最變態的時候: 見住自己 jog 上草山

斜路跑一律都視為戀態行為

法國哲學家笛卡兒說世界可以是虛幻,感官可以是虛幻,只有思考能證明存在 (existenia),「我思故我在」(I think; therefore I am),OK 型。其實跑在荒僻的山徑,踏著逾千的石級,四頭微微酸痛,小腿輕輕扯緊,汗水緩緩滑過。那種奮戰、孤獨、迷茫、克服、堅持、咬住唔放棄嘅意志,都好鬼 I am,刷到萬二分存在惑。

笛卡兒   圖: 百度

但我喜歡思考,因為思考可以在梳化、床上、Starbucks、特別是 office hours 進行,唔洗爆肺爆汗買gear。其實都經常被好多人叫我思考,俾個客投訴我死都唔認錯,老闆倒抽一口涼氣對我說:「你自己諗吓啦!」食完晚飯我攤係梳化冇幫手執枱,老婆怒啤拉高尾音同我講:「你自己諗吓啦!」( 「喂,今日父親節喎」)。

跑山要爆林同腦細突然返office一樣,通常係唔會早響同好驚嚇

「喂呀,你諗緊野呀阿孫?」
「係呀,你點知嘅?」
「妖,你成個樣都係!」


文章為作者意見,不代表Fitz立場。