中國馬拉松比賽，有時花邊新聞仲精彩過賽事本身。呢次喺11月初舉行嘅杭州馬拉松，有人發現身穿248號碼布選手，分別穿上大陸品牌比戈、特步及李寧三個品牌嘅服裝，腳上嘅跑鞋亦從特步換咗李寧。總括而言，一場42公里比賽，佢成功換咗三套衫、兩對鞋。
就喺呢輯相喺網上瘋傳之後，呢位「248選手」竟然現身，毫不諱言自己係相中人，仲話自己跑出2小時42分，有證書為證。佢話之所以咁做，係想測試國貨究竟有幾勁，結論係: 「每家品牌裝備性能都無可挑剔，值得大家選擇」。另外有網民亦指出，三個品牌各有宣傳活動，所以有此安排不足為奇。
不過，248呢番咁愛國嘅舉動，仍然有唔少網民負評，有人覺得佢裝模作樣，有人甚至搵出杭州馬嘅規定，話佢停低換衫可被DQ。睇嚟248未必一戰成名，反而有唔少手尾要跟。
資料: 搜狐
