Fitz > 運動 Sports > 跑步 Running > 東京馬拉松破最多人同時達成大滿貫紀錄 | 84歲婆婆跑步20年成最年長大滿貫跑手

今年東京馬拉松打破一項健力士世界紀錄，就係史上最多人同時達成「馬拉松大滿貫」嘅榮譽，即係完成波士頓、紐約、倫敦、芝加哥、東京及柏林六場馬拉松。東京馬當日，一共有3033名選手於當日取得「六星」獎牌，其中有40人拎到第二塊六星獎牌，5人第三次成功，1人第四次成功。

眾多跑手裏面，包括來自美國嘅 Liz Borrett，佢今年84歲，係2023東京馬拉松年紀最大嘅女性「六星跑手」。

Liz 婆婆63歲跑人生第一場馬拉松，當年佢從護士崗位上退休，但同時失去丈夫，人生頓即失去方向。Liz 因緣際會之下參加夏威夷馬拉松，仲順利完賽。雖然成績並唔突出，但佢仍然幫到一間慈善機構籌得善款，亦鼓勵到佢繼續參與馬拉松賽事。

多年之後，Liz 完成紐約、芝加哥兩場大滿貫，2013年參加波士頓馬拉松，點知遇上恐佈襲擊，人生經歷另一衝擊。第二年佢重拾心情，再次返回波士頓，並以4小時22分得到分齡組別冠軍。

2017年及2019年，佢分別完成柏林同倫敦兩場歐洲大滿貫。不過全球疫情爆發，剩番嘅東京馬拉松遲遲未可以落實參賽。當時婆婆已經踏入80歲，面對體力衰退問題。

「活到我咁嘅年紀，都明白好多事情心急係無用。最後呢場大滿貫，我只要完成就得，唔好介意跑咩時間。」好彩，今年東京馬拉松重新舉行，婆婆及時參賽，順利完成。

完成大滿貫之後，Liz 婆婆表示仍然會繼續跑步，不過因為體能問題，佢唔會再參加馬拉松，最多都係跑下半馬。