3月1日舉行嘅巴黎馬拉松半馬拉松，因武漢肺炎疫症蔓延，早前宣佈比賽延期至9月6日 (更新: 4月5日巴黎馬拉松亦宣布延期至10月18日)。同法國一海之隔嘅英國，4月26日舉行嘅倫敦馬拉松，亦有取消壓力。
「倫馬」比起巴黎馬拉松更加大規模，呢項「六大滿貫馬拉松」參加者45,000人，賽道兩旁嘅觀眾估計可多達一百萬人。現時英國雖只有51宗確診個案，不過意大利疫情大爆發，英國民眾都對疫症相當擔心。
英國媒體報道，倫敦馬拉松主辦單位已經召開急緊會議，商討應對方法，賽事總監 Hugh Brasher 明言，佢哋而家有留意住政府同世衛消息，暫時仲未有任何決定。
英國衛生部長 Matt Hancock 透露，現階段咩都有可能，包括取消倫敦馬拉松，不過而家做決定實在太早 (far too early)。
英國媒體睇淡前景
事實上，英國媒體相當唔耐煩，佢哋希望盡快有決定，亦批評倫馬大會同政府官員互相推波。而當地媒體其實對前景相當悲觀，因為:
- 倫馬會招待超過一百萬名選手及遊客，如果疫症持續，好大可能令英國爆發疫症
- 數之不盡嘅國際體育活動需要取消。其中影響最大係電單車格蘭披治賽 MotoGP，賽事頭兩站 (卡塔爾站及泰國站) 已受疫情影響而取消
- 歐洲全部國家都有武漢肺炎確診個案，係繼中國、日本、南韓三個東亞國家外疫情最嚴峻地區，倫馬難以置身事外
值得欣慰嘅係，美國情況相對理想，3月8日嘅美國洛杉磯馬拉松可如期舉行，4月20日嘅波士頓馬拉松仍相對樂觀。
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。
