更新: 7月4日 Frank Meza 被發現倒斃河中，享年70歲。
2:53:10呢個全馬時間，肯定係唔少跑友夢寐以求嘅成績。而 Frank Meza 呢位70歲伯伯，竟然喺本年3月嘅洛杉磯馬拉松 (Los Angeles Marathon) 做出呢個成績，打破賽事分齡紀錄。
不過，事後有人指出 Frank 伯伯喺某幾個分段，所造出嘅時間快到無倫。根據 Frank 比賽時嘅分段時間，佢當日大致步速喺8:23一英里 (即大概每公里跑5:14)，但喺某啲路段竟然可以跑出6:30至6:40一英里 (大概係每公里跑4:10)，仲可以維持喺5公里左右。呢個時間，絕對可以打破5公里嘅分齡世界紀錄!
Frank Meza。疑點之一，話佢幅號碼布唔係掛喺跑Tee，一除即甩，方便交畀槍手。
主辦大會，隨即翻查比賽片段，發現 Frank 多次進出賽道，而且號碼布更有疑似移動過嘅跡象。大家不妨落足眼力睇睇:
有支持Frank Meza嘅跑友，話佢只係走咗出去拉筋。不過，大家問下自己，你跑緊跑仔要抽筋，會唔會走到無雷公咁遠?
由於 Frank 提交唔到跑步時 GPS 紀錄，亦解釋唔到佢點解有5公里跑得特別快，有人懷疑佢中途走捷徑。而比賽大會以其成績有問題為理由，取消其比賽資格。不過，大會仍邀請 Frank 參加2020年嘅比賽，希望佢用實力證明裁決有誤。
Frank 話無論如何都會參加，以證明自己嘅清白。
落到民間，Frank 已成為美國跑圈一大粒花生，LetsRun 討論區更多達250幾頁，有人踩有人撐，大家想湊熱鬧可以入去睇睇。
Fitz連結: https://fitz.hk/?p=122248
張伯倫
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。