[港珠澳大橋馬拉松] 全國兩會將熱烈討論!

心水清嘅朋友相信會記得，2018年年初中港澳媒體同時報道，話港珠澳大橋通車前夕會舉行「港珠澳大橋馬拉松」，連舉辦日期、路線、過境安排都有齊晒。計劃當然吸引唔少貪新鮮嘅跑友注意，可惜呢場比賽最終不了了之。

不過，根據《明報》報道，三月初北京召開嘅「全國兩會」，有人大代表將提出落實舉辦「港珠澳大橋馬拉松」喎。所謂「兩會」，就係人大 (人民代表大會) 以及政協 (政治協商委員會) 齊齊開會，總之係傾國家大事啦。

搞馬拉松係咩國家大事呢?

1. 當全國上上下下都用盡全力推廣「大灣區」概念，「港珠澳大橋馬拉松」，由香港、澳門，跑到去珠海，絕對係大灣區嘅體育盛事。對宣傳大灣區，鼓勵大家搬去大灣區住，肯肯定好有幫助。
2. 如果只係睇電視新聞，大家可能以為「全國兩會」只係大大企喺人民大會堂講幾個鐘頭嘢，台下嘅伯伯嬸嬸坐定定喺到，適當嘅時候拍下手咁上下。不過，大大唔講嘢嘅時候，各地區嘅與會代表其實會趁機開下會傾下嘢。而「港珠澳大橋馬拉松」涉及中港澳三地，呢啲場合大家三口六面傾掂數，要落實計劃一啲都唔奇。

提出呢個建議係港區人代盧瑞安。盧先生本身係香港中國旅行社董事長。呢類跨境馬拉松絕對對佢間公司百利無一害，相信會盡全力推廣。至於比賽成唔成事，就要睇下往後點發展。經過舊年胎死腹中，筆者都唔敢跟車太貼鳥。

資料來源: 明報

>> 舊文回帶: [最近香港的海外馬] 港珠澳大橋馬拉松1月中報名 (2018年1月文章)

Fitz連結: https://fitz.hk/?p=114913

更多:
Fitz Facebook專頁
香港運動比賽時間表
Fitz Running 跑步