Fitz > 運動 Sports > 跑步 Running > 美國兒童捲入跑步機致命: 家用跑步機安全守則

美國消費品安全委員會 (CPSC),日前下令回收一款跑步機 Peloton Tread+,指呢款跑步機發生多次將兒童捲入意外,造成38名用家受傷、1名孩童意外死亡。當局並公開一條意外短片,片段顯示,兩名小朋友喺跑步機附近玩,其中一名拎住波波嘅幼童突然捲入跑步機機底,進退不得。大概超過30秒後,跑步機先至停低,將幼童救出。

CPSC 目前呼籲用家停止呢款跑步機,並且下令製造商回收產品。不過生產商 Peloton 反指當局指控無理。生產商話,佢哋嘅產品已清楚列出跑步機「禁止16歲以下人士使用」,亦呼籲用家唔好畀小朋友走近,所以 Peloton 話上述嗰幾十宗意外,純綷係用家疏忽。不過 Peloton 上個月以電郵通知用家,自爆話曾經發生一宗意外,導致一名兒童死亡。

Peloton Tread+

家用跑步機安全守則

跑步機係最普遍健身器材之一,美國2014年嘅統計,話每年有超過20,000宗跑步機意外。近年跑步機由健身室走入家居,跑步機嘅安全更成為家居安全問題。家用跑步機因為環境所限,比起健身室更需要講求安全:

1. 使用時避免兒童接近

跑步機係設計畀成年人使用,兒童使用有一定危險,所以一方面唔好畀兒童玩,另一方面當成人使用跑步機時,亦避免兒童接近。最好嘅話,就將跑步機截斷電源,令兒童唔可以自己開機。

2. 注意擺放位置

使用跑步機嘅位置,附近唔好有太多雜物,以免因意外滑落時撞到。

跑步機安全扣

3. 跑步機上的安全

  • 使用安全扣,當意外滑落時可即時停機
  • 開機,調較速度後,然後先將雙腳放上跑步帶,避免失速
  • 跑步時可以睇戲、聽歌,但仍需集中精神,唔好因為分心而發生意外
  • 停機後唔好即刻停止腳步
留意擺放位置,當滑落時唔會有更大意外。

總之跑步機如果使用不當,會成為家居陷阱,用家應當注意。

資料: 美國消費品安全委員會 CPSC


文章為作者意見,不代表Fitz立場。