Fitz > 運動 Sports > 跑步 Running > [講跑品] 呢次批踭,下次出血滴子? (Asics大埔半馬)
圖: HNR 跑步團隊

利申:小弟只係聽到朋友描述,道聽塗說,並強行出頭。而我並唔係針對特定比賽,只係想講下跑品。

是咁的,星期日 (12月10日)大埔舉行首屆「大埔半馬」比賽。比賽分兩個項目,半馬組別7點45分起步,10公里組別7點55分起步,前後相差10分鐘。

有朋友反映,佢哋跑半馬,但由於初段人多路窄,只能慢行 (其實好多比賽都係咁)。不過,10公里組別起步後,有一大班跑友「好似黑社會尋仇咁,喺後面追上嚟」! (這裏引用朋友用語)

當呢班10公里跑手被半馬跑手阻住嘅時間,有人仲做出以下行為:

  1. 呼喝參加者,要人避開佢哋
  2. 批踭,以暴力撞開跑得慢嘅人

當然,先旨聲明,上面呢啲情況,可能只係個別事件,未必可以反映整個比賽嘅情況。不過對於「批踭」、「呼喝」呢啲行為,我覺得要對呢啲行為,作出最強烈嘅讉責:

  1. 任何比賽參加者,在跑道上都係平等,無人會比其他人優先。賽道擠逼要自己想辦法爬頭,其他人無義務閃避其他人,無論係快腳定慢腳
  2. 批踭、大聲呼叫呢啲行為,可造成身體傷害,根本係暴力行為。呢次批踭,下次係咪用血滴子? 而且喺比賽中行使暴力,絕對應該被DQ
  3. 如果嗰班所謂快腳,用粗暴方式去奪得獎項,或者PB,都係使用咗唔正常方法,根本係勝之不武
  4. 其他比賽嘅主辦單位,應該盡力避免呢啲情況再次出現,以保障參加者人身安全。措施包括完善賽道、改善起跑時間、加強賽道管理等

如果參加者只係為咗時間,做出無禮行為,咁佢哋就算贏到任何獎項,都贏唔到其他人嘅尊重!



更多:
Fitz Facebook專頁
跑步培養不到好品格
香港長跑行山比賽時間表
Fitz Running 跑步


文章為作者意見,不代表Fitz立場。