Fitz > 運動 Sports > 跑步 Running > [貝魯特馬拉松] 愛與和平的使者

前言: 講起黎巴嫩,敘利亞同巴勒斯坦呢啲中東國家大家會諗到咩? 戰亂? 難民? 恐怖份子?

慕尼黑事件與黎巴嫩內戰

圖片來源

開場都要好簡單噤講下歷史先: 1972年德國慕尼黑奧運會,巴勒斯坦武裝組織黑色九月對以色列代表團策劃恐怖襲擊,最後代表團全團11人加2名警察死亡。電影慕尼黑大家都可能睇過,不過其實慕尼黑慘案對黎巴嫩影響好大。巴勒斯坦解放組織係試圖刺殺約旦國王失敗之後被驅逐到黎巴嫩南部,因為慕尼黑慘案引發種種導火線令黎巴嫩內戰爆發。內戰一打就16年,由1975年打到1991年先結束。

內戰雖然結束,但係炸彈襲擊同暴力事件並未減少。暗殺事件不斷。2006年以色列同黎巴嫩真主黨開戰,之後國內武裝衝突持續。近年情況稍為好轉,不過一直仍然有汽車炸彈同自殺式炸彈襲擊事件; 多年來嘅仇恨冇可能咁容易消除……

不能再跑的跑者

May El Khalil 係黎巴嫩人,亦都係熱愛跑步嘅跑友。2000年 May係練跑時發生交通意外,死過翻生昏迷左兩年先醒返。不過醫生話佢冇可能再跑步。

晴天霹靂,不過May姐佢冇放棄跑步。佢話: 自己跑唔到都希望其他人同多啲人可以跑到,之後佢開始四出奔走。跑步可以治療心靈,May姐希望舉行馬拉松可以為自己不能再跑嘅痛苦帶來治癒,亦希望可以為黎巴嫩帶來愛與和平。

貝魯特馬拉松

圖片來源

黎巴嫩首都貝魯特,曾經被稱為東方的巴黎。2003年第一次有馬拉松,就係因為係May姐努力低下成功舉行。今年2019年將會係第十七屆。近年馬拉松都係係首都新建嘅商業區 Beirut Souks 起步,沿途經過 Avenue de Paris 大道,舊區 Hamra District 同 Avenue Général de Gaulle。之後經過 Horsh Beirut 公園同 Mar Mikhael 區,最後到達終點 Martyrs Square 廣場。其實市區大部分已經重建,係地中海沿岸跑,風景優美,但係小部份建築物仍然可見內戰留下嘅痕跡。

圖片來源

喺中東,馬拉松想帶出嘅政治信息比較多。國家紛亂,局勢經常緊張; 通過馬拉松人民希望可以多一個發表聲明嘅途徑,亦可能係唯一可以令人放低武器放下分歧嘅運動。

不一様的海外馬拉松

圖片來源

貝魯特馬拉松作為國際田聯銀標馬拉松,仲要唔駛抽籤。不過保安局由2011年起對黎巴嫩發出紅色外遊警示,有一定風險。中東好多國家 (以色列,巴勒斯坦,伊拉克,約旦同黎巴嫩) 近年都有馬拉松; 相對6大或者廣受大家歡迎嘅日本馬,利用雙腳看世界,其實我想去中東跑一次多啲。

睇都呢到,其實大家最想去參加嘅馬拉松又係邊到呢?

資料來源

Fitz連結: https://fitz.hk/?p=115831


更多:
Fitz Facebook專頁
Facebook不上載 記錄不存在
跑咗三年,究竟有咩得著?
尊尼@Fitz
Fitz Running 跑步


文章為作者意見,不代表Fitz立場。