商業新聞網站 Business Insider 爆出內幕消息，話好多專業跑手為求比賽有好成績，在違反贊助合約情況下著上 Nike Vaporfly 上陣。跑手亦為免唔好太張揚，竟然將跑鞋塗黑!
Business Insider 訪問咗多位跑手及教練，連同佢哋喺各地大賽搵到嘅圖片及資料，發現呢啲專業跑手曾經試過「塗黑跑鞋」:
Tommy Rivers Puzey
Altra Running 贊助跑手，個人最佳成績2:19:57
Puzey 話: 「本身我好鍾意贊助商嘅產品，但係Nike呢對鞋，真係令人做出好成績。如果無咗佢，我真係拎唔到奧運資格。」
「專業跑手要提升1.5%嘅成績，往往要用兩年時間去認真訓練，仲要嚴格控制飲、復健等等。不過如果有另一個牌子嘅跑鞋就可以改善成績，點解唔試下呢?」
結果，Altra 同佢中止合作關係，Puzey 過檔至 Craft Sports。
Stephen Scullion
Under Armour 贊助跑手，個人最佳成績 2:11:52
Scullion 拒絕接受訪問，但 UA 向傳媒話，Scullion 而家幫 UA 開發新跑鞋，未來佢都會穿著 UA 上陣。
Joaquín Arbe
New Balance 贊助跑手，個人最佳成績2:11:02
Arbe:「嗰陣我其實同 Nike 傾緊新合約。」訪問之後，Arbe 已過檔至 Nike。
生產商只能默默承受
Nike Vaporfly 推出多年，經過場內場外多次證明，呢款鞋真係有助跑手做出好成績，根據 Nike 數據，佢甚至有助跑手跑快4%。有生產商表示，明知自己產品較為蝕底，為令旗下跑手可以揚名立萬，亦被逼默許佢哋著住對家嘅產品。
剛簽下 Tommy Rivers Puzey 嘅 Craft Sports，集團 CEO Eric Schenker 表示:
「旗下跑手比賽時唔著贊助品牌產品，係超級唔合理，但如果我哋提供唔到合適產品，咁亦無可奈何接受現實。畢竟專業跑手係要追成績，成績唔好，贊助商利益亦會受損。」
國際田聯已多次改變規則，以求阻止「一鞋獨大」情況持續，亦希望各個品牌加把勁，推出更多好嘅產品啦。
資料: Business Insider
>
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。
