Fitz > 運動 Sports > 跑步 Running > [逆走100 Rebel Walker] 100公里完走全紀錄

今次逆走8:00am正式起步,一路走一路走,沿路嘅氣氛都好好,成個人都輕鬆咁過左頭4個CP,亦都同自己預計時間一樣。

頭段過咗兩座大山,身體雖然冇太大反應,只係已經感覺到膊頭開始痛,可能因為平時長時間返學咩重嘢。上去針山嘅時候,每一下舉 pole 都有種針吉嘅感覺,篤下篤下就上到針頂。你當我想落山嘅時候,有個師兄同我講:咦! 師兄你水袋漏水喎。我當時望一望先發現,原來水袋個飲水位爛咗,懷疑係攞 pole嘅時候夾爛。心知不妙,一路落城門,啲水就不停射出嚟,唔知真係以為我賴尿😅

一落到城門水壩,見到女朋友喺度等,個一刻真係精神晒,有種錯覺以為自己到終點,去到水站嘅時候仲唔記得自己個袋穿左,整濕晒人哋個地下😂去到燒烤場,多謝Will爺、Jessica Chan 嘅牛肉飯,一路食飯一路按摩,真係好唔捨得走😭,辛苦你地啦🙇🏽‍♂️

過咗城門之後,天開始黑急急腳過咗金山,因為避免入夜比猩猩強姦😂

入夜後,完全兩個感覺,要開始放慢腳步,睇清楚前邊嘅路況,一路跟住前面嘅師兄,keep 住11:00 pacing,落到去大埔公路。一落到去馬路就見到 Kaluen Yip 迎接我,好多謝你呀,去到獅子亭見到康師父 Pi 已經準備好物資,問咗pi攞咗兩粒止痛藥防身,不過狀態都仲良好,好快又上咗路。臨走前仲再次見到 On

時間越來越晏,雙腳亦都越嚟越慢,去到基圍爾之後,精神狀態已經開始頂唔住,見到自己嘅時間已經慢咗落嚟,上水牛山嘅時候,一大段暗斜,平時操練呢段路係最辛苦,咩都唔諗淨係望住自己隻腳慢慢上去。

喺昂坪附近嘅58km雙腳開始發軟,原本諗住休息一陣,點知開始 feel 到周公搵我,我就訓左10分鐘左右,依一次就變成左惡夢嘅開始💩之後去到64km嘅時候,經過完一輪落山,雙腳已經無力,又眼瞓又頭痛,眼見身邊好多人都坐低左休息,自己又唔爭氣坐低左,明明前邊已經係一大條車路,點知一瞓就瞓咗半個鐘,一起身身邊咩人都冇晒,望一望手錶,心諗大獲啦。足足慢咗三個鐘三個鐘,之後勁唔好意思咁要 Karen Ha、Yvonne、Pi 等左三個鐘,落到去 CP7。好多謝你哋係水浪窩係咁等,連原定買落嘅飯後都凍哂,食咗個杯面,食埋止痛藥就上路。臨出發前,再次見到你 Ho Hang 同 Wandy Pun,你嘅一句:「你點都要同我玩埋落去啊,唔好中途走,加油啊終點見!」,令我叉足電夠膽挑戰雞公山。

上雞公依段唔係講玩,上極都上唔完,見到 Alex 開始出現抽筋,自己又 feel 到有水泡嘅現象,同自己講我會盡能力追時間,呢段路可以話係最辛苦最辛苦嘅一段,連講粗口嘅力都冇,好唔容易上到雞公頂,成個人瞓低咗,體力透支。原來自己唔知自己發生咩事,一擘大眼就過咗個半鐘,起身嘅時候發覺自己身體濕晒,全身發震,睇返環境,先知應該落咗一場雨,但我竟然完全唔知發生咩事。

係嶂上附近,每次見到一個大石,就會諗方法爬過去休息,見到天開始越嚟越光,就知道周公終於要走啦。日出後開始追返時間。去到赤徑隻腳痛到不得了,睇一睇原來有水泡,每一粒步都要忍住痛,心諗快啲到水站啦唔該,落到西灣、鹽田灣啲沙同粒水泡喺到磨擦,簡直唔知點形容。

好多謝係水站嘅大會義工,去到水站即刻問使唔使補水,我話咩都唔要,問有冇兩張膠布,佢哋即刻幫我左搵右搵,同時亦同附近嘅參賽者講,之後雖然短短 6km,但要先上西灣山再落浪茄在上先到東壩,見好多參賽者喺到 quit。

我就同自己講,仲有一個人係終點等我,唔可以咁易放棄,我仲有能力走落去,我唔要人哋話我唔得就唔得,就算冇時間,我都要博一舖。因為仲有個傻婆係終點等我,仲有好多人支持我,唔可以浪費佢哋嘅心機。亦同自己講過,之前就係聽人游說導致自己放棄,自己根本冇盡過力冇試過,唔會俾依次機會再出現會再出現。

黐完膠布就即刻上路,路上同自己講,你得㗎! 你得㗎! 過完浪茄之後,見到同最後 CP cut off 時間只有半個鐘,再諗一諗以前自己露營都要行半個鐘,依家仲有冇可能自己真係唔知,試一試佢! 最後用咗13分鐘浪茄去到東壩! 沖CP嗰一刻真係仲快過衝終點

最後10K,多得個傻婆逆走過嚟搵我,佢真係「逆走」我個逆走,最後好彩有佢陪我,係太陽最猛烈嘅時候,有佢陪我行完東壩同西壩,我先捱到去終點。衝終點前一刻,仲特登走快啲幫我影相。好多謝你。琴日 support 完我,今日仲係終點等我,你知我比預計遲咗,唔想白白等我就逆走過嚟搵我,多謝你啊!

photosbyme photography 遊。我攝 Facebook 專頁

影片 shot on GoPro Hero 5
器材提供: Microworks

Fitz 文章連結: https://fitz.hk/?p=90620

更多:
Fitz Facebook專頁
一次毅行一份情
Fitz 行山 Hiking


文章為作者意見,不代表Fitz立場。