連續六個年代跑入Sub-3 兩位手足同創世界紀錄

上個月美國侯斯頓馬拉松 (Houston Marathon)，誕生一項極為難得嘅世界紀錄。來自加州嘅 Antonio Arreola 以及密芝根州嘅 Steve Schmidt，雙雙創下「連續6個10年 (6 decades) 跑入 Sub-3」嘅世界紀錄，簡稱「6DS3」。

Antonio Arreola 今年60歲，17歲初馬跑出2:58，之後每個10年sub-3一次，最好成績係2001年嘅2:46:17。

至於59歲嘅 Steve Schmidt，19歲開始達成第一個 Sub-3，PB係1984年造出嘅2:37:03。

有伴成為破紀綠關鍵

侯斯頓馬拉松當日，兩位跑手矢志同時打破世界紀錄，佢哋喺起步前兩日已經話要約埋一齊衝線。不過佢哋兩位嘅起步區唔同，直到34公里，Steve 先至從後追上 Antonio，一齊完成最後8公里，更手牽手衝過終點，同在場觀眾一齊慶祝。

Antonio 同 Steve 不約而同話，要破呢項紀錄少啲毅力都唔得。而當中關鍵，係佢哋兩個互相支持。Steve 話佢比賽前10日患上感冒，起步後都覺得狀態唔多好，但憑住要追上 Antonio 嘅決心，一步一步慢慢追，最後卒之可以達成目標。

而 Antonio 話，呢場比賽係佢跑步生涯最光輝時刻，佢仲刷新咗一項紀錄: 第一次 Sub-3 和最後一次Sub-3 間距時間最長: 43年45天 (由1976年12月5日 至 2020年1月20日)。

如何維持長年Sub-3狀態

究竟呢佢哋兩位高人，有咩方法長年維持咁高水平嘅比賽狀態?

• 兩人都不約而同甚少參加比賽，每年大概兩場全馬 (一場春天、一場秋天)，其餘時間跑下短途，大約5公里左右。Steve 補充，佢跑5公里時會盡力以20分鐘完成，唔係到全馬好難跑入 Sub-3。

• Antonio 於2009及2016年受腳腿困擾，佢話千祈唔好灰心，要積極面對。此外在練習時要好好聆聽身體聲音，遇到唔舒服就要適當調整，病向淺中醫。
• Steve 補充，想跑得越耐，就必須要保持健康。佢除咗練跑，仲會做好多抗阻訓練、拉筋、增強式肌肉訓，以及踩單車等。目的係為咗鍛鍊小肌肉群，提高跑步穩定性，避免腳傷。
• 團體訓練十分重要。Antonio 話曾經跟過一個跑團達18年，覺得團體嘅互相支持同鼓勵相當重要，令自己可以保持信心。
• 維持適量跑量。兩位跑手都唔需要高里數訓練，每周大概跑64至112公里，反而更專注休息時間，同時亦重視交叉訓練。
• 隨時年齡漸大，唔少人都勸佢哋跑慢啲。不過，Steve 覺得減少競爭性，會令跑步嘅推動力大為降低。唔逼自己，又點可以破紀錄?

兩位跑手亦同時話，其實跑步唔好諗咁多嘢，想跑就去跑，唔好理咁多天氣、體能、技術，鍾意跑就跑，需要理由嗎?

資料: Podium Runner