[香港渣打馬拉松2020] 田總主席: 唔擔心會搞唔成

香港馬拉松2月9日起步，早前主辦大會向選手發出電郵，選手包於2月5日至8日領取，睇嚟大會對如期舉行充滿信心。

早兩日主辦單位香港業餘田徑總會主席關祺，接受《南華早報》訪問，直言「無乜嘢需要擔心」(We don’t have too much worries)。佢話:

「我哋2020年嘅賽事已經準備就緒，希望可以令大家都享受嘅賽事。至於有無咩事會影響比賽，我並唔係太過擔心。」

另一位田總高層秘書長伍于豪就話，自從去年區議會選舉之後，社會氣氛變為平和，佢相信賽事可以順利進行。

呢兩位田總高層，口吻似足政府官員，但其實並唔係無的放矢。因為舊年12月嘅港島10公里賽，參加者3000人，部份賽道同「港馬」重叠，最終能順利舉行。而1月初嘅香港街馬，32公里項目由北角經東隧去土瓜灣，亦算係相安無事。

不過，田總嘅樂觀態度，有可能只係「打腫塊面充闊佬」。事關現時「港馬」為國際田聯金級賽事，如果賽事要取消或者改期，隨時影響評級。而近年來，無論中國大陸、台灣，以至東南亞各地，都希望能提升賽事嘅地位。譬如話台北渣打馬拉松今屆已進行大改革，而新加坡亦由一日賽變為三日賽，都係將比賽越搞越大。萬一「港馬」被逼取消，甚至中途腰斬，就隨時會被人從後追過。

田總極希望賽事可以順利進行，事實又係咪咁樂觀呢? 有業內人士提出幾項擔憂:

1. 政府取消年初一花車巡遊同年初二放煙花，即係話局勢仲未平穩
2. 「港馬」七萬幾人跑勻香港、九龍、新界咁多地方 (路經6區，佔香港三分一)，萬一其中一個地方發生事端 (例如有警民衝突，警方放催淚彈)，足以影響整個比賽
3. 場內選手如果有人採取激烈行動，主辦大會未必有能力處理。唔通每個水站都要派出防暴警察?
4. 民間已有聲音於農曆年期間大搞「和你X」活動，佢哋可能趁假期時重整旗鼓，再有新一輪示威活動出現
5. 香港街馬由民間團體舉行，並且係慈善活動，所以無人會針對佢哋。反而「港馬」主辦嘅田總，算係半個政府機構，活動期間有示威行動，不足為奇。

呢位業內人士覺得，如果田總只係為咗維持金級而冒險舉行比賽，似乎有啲不負責任。

希望有關方面堅持舉行比賽嘅同時，都會制訂一啲措施可以保障選手同市民嘅安全啦。而作為小市民，比賽搞唔搞得成都係其次，最緊要唔好有人受到傷害。

資料: 南華早報