Fitz > 運動 Sports > 跑步 Running > [馬拉松鬧劇] 新加坡代表因比賽代表反目 控隊友誹謗
兩位隊友因言論而打官司 Liew Wei Yen (右) 同 Soh Rui Yong (蘇瑞勇)

新加坡兩名馬拉松國家隊代表,最近因一宗誹謗官司而鬧上法庭,受當地媒體廣泛報道。呢單官司,要由2015年東南亞運動會 (SEA Games) 講起。

2015年嘅東南亞運於新加坡舉行,新加坡為東道國,男子馬拉松兩位主場出戰代表 Liew Wei Yen 同Soh Rui Yong,成為國內焦點。不過,賽事中段有選手跑錯路,領先嘅 Liew 聲稱「專登跑慢啲」去引導其他選手跑返正路。隊友蘇瑞勇就喺呢個時發力狂奔,最後贏出比賽,Liew 只能得第八名。

呢件事就成為兩名選手之間嘅衝突點。2018年,國際公平競賽委員會 CIFP 表揚 Liew 嘅行為,並向佢頒授奬牌。

CIFP 喺 Facebook 表揚 Liew 話:

「這位新加坡人並沒有利用自己的領先優勢,而是決定等待他的對手。Liew 的公平競爭行為可能使他失去了一枚獎牌,因為他最終以2:44:02獲得了第8名,而他的個人最好成績是2:32:12。」

不過,比賽冠軍蘇瑞勇就唔同意呢個講法,佢回應 CIFP 嘅帖子時話:

「領先嘅 Liew 因轉錯彎而額外跑了700米,他在2:44:02獲得第8名,而當天的銅牌是2:37:10 (落後6分鐘52秒),說 Liew 放慢腳步,其實會貶低當時的銅牌得主越南選手 Hoang Nguyen Thanh 努力成果。」

而呢幾年,蘇瑞勇多次喺公開場合發表呢方面言論,Liew 終於忍唔住,控告佢前隊友誹謗。

2020年開庭審訊

2020年9月,呢宗由 Liew 控告蘇瑞勇嘅誹謗案件卒之開審,而雙方爭論嘅問題係:

  1. Liew 知道跑錯路之後,有無「放慢速度」等其他人呢? (蘇瑞勇話嗰段路700米,Liew 用左2分幾鐘完成,唔算好慢)
  2. Liew 有無犠牲得獎牌機會而幫助其他選手? (蘇瑞勇話 Liew 本身都跑得唔快,出盡全力都唔可上頒獎台)

截至9月中案件仍在審理,有興趣朋友可以留意。之但係,兩位曾經做過隊友嘅馬拉松跑手,因幾句言論就要打官司,唔少人覺得小題大做。誰是誰非,真係審死官了。

資料: 海峽時報