可能係上天嘅安排，就係毅行者後一日，我帶著疲累嘅雙腳，揸電單車返工時落起大雨，我一不留神發生交通意外，迎來人生第一次住醫院。我第一時間擔心嘅唔係傷勢，而係兩星期後嘅樂善盃，點算呢?
本應投入訓練，反而無奈地躺係床上，望住天花板，係腦海中試路，背出全條樂善盃賽道。比賽前五日再請教宏俊 carbon loading「餓三日吸兩日」嘅做法。休養期間反而令我叉滿電，第一次感覺到調教到最佳狀態去應付重要比賽。
2012年12月9日樂善盃，我無再帶番薯，而係帶咗 gel，仲買咗條短 tight，同師兄弟整咗件 Champion System 紫色嘅戰衣，我真係準備好了! 係起跑線上，周圍望都見唔到超賢，但我依然相信佢會出現。
由一起步，我就一直帶頭。同一條路，唔同嘅係我前面已經冇人，而後面有3499人，心理壓力好大啊!
做跟隨者容易，當第一次做開路者嘅時候，先發現難度大好多，一邊跑，一邊要做好多動作及思想上嘅計劃:
- 每過一個路口都要花多半秒時間睇清楚路標
- 到達 CP 時，義工都未預備好招待選手
- 每當遇到路人，要大聲提醒「早晨 / 小心 / 唔該借借 / 後面有幾千人黎緊」
- 每次嘅停頓，就會被後面追近，去到唔清晰嘅路口，更加要等埋選手確認正確路線
- 如果自己行錯路，有機會影響後面跟隨嘅人
- 假如錯得太遠，更有可能獨自係山野中迷失
- ⋯⋯
終於，我都能由頭帶到落尾，係樂善盃獲得第一名，係一年半嘅跑步生涯入面，首次贏得大賽事嘅全場總冠軍。
賽後刻意站係終點線等，我逐個數著：2、3、4、5、6……最終超賢都無出現。
人生有一個年頭，每日諗住「如果贏到樂善盃就好啦」但當做到嘅時候，不禁問自己「咁就到達越野跑盡頭嗱?」回想起來，其實最開心嘅階段就係前面有人帶住，每朝早起身努力鍛練，睇住自己進步，向住目標努力。但當到達目標後，下一步呢? 頓時出現一種強烈嘅失落感，就好似打爆機，又或者煲晒一套劇一樣嘅感覺。
然而，呢種失落感只係維持左好短時間，因為呢一年半嘅努力，得到曾小強師兄嘅賞識，並係樂善盃賽事上嘅見證，隨即引薦我加入 The North Face Adventure Team，帶我進入越野跑新嘅領域，進而挑戰海外賽事，邁向世界版圖。原來呢個遊戲，我只係過版，仲未爆機。世界之大，我以世界各地高手做目標。
賽後，我搵超賢傾計，佢因為工作關係，所以漸漸淡出。我覺得好可惜，同時產生個疑問「越野跑冠軍，都會因為生活嘅困難而選擇淡出?」試想一下，想投放時間同青春嘅年輕跑手，知道咗香港越野跑前景如此，都會卻步，咁我點鼓勵年輕跑手加入呢個行業? 我突然又搵到作為開路者嘅樂趣，想試下用自己嘅力量，去改變呢種現實嘅格局，為香港越野跑嘅發展同未來出一分力!
現時視角
人生嘅路，本來就係迂迴曲折，就好似越野跑一樣，但因而精彩。
寫跑步回憶錄，主要想藉住交代呢段鮮為人知嘅過去，鼓勵人踏出第一步，去嘗試，會有意想不到嘅收穫。面對困難時，堅強啲，肯捱唔怕辛苦，未來仍然充滿希望，機會處處，我哋唔好放棄呀💪🏻
到2013年，開始玩社交平台，好多故事都講過。有機會仍然想同大家重溫一下連番激鬥嘅山野之王、DNF 嘅祈山100、人生低谷、極地體驗、代表香港出戰世界賽、UTMB 等等。
暫時靈感用盡，需要儲返啲腦細胞🧠 希望日後有機會再寫續集😬
黎緊又想寫下 THE PEAK HUNTER 血淚史，講述一班年輕人創立一個越野跑會當中發生嘅一個個有血有汗，有笑有淚嘅故事。有關故事，會係另一個平台呈獻，敬請期待。
預告
前幾日，徐仔送左本書俾我講:「有個成功企業家出左本書，入面講嘅野好似你。」我有啲沾沾自喜咁回應:「本書講咩嫁? 😎」答:「講啲人常犯嘅錯誤」我:「🤦🏻♂️」
>
原文載於 Wong Ho Chung 黃浩聰 Facebook專頁
香港頂尖越野跑手，正職消防員，贏取的錦標不計期數。2018年以戈壁沙漠冠軍、阿他加馬沙漠、納米比亞沙漠亞軍，以及南極冠軍，奪得世界四大極地超級馬拉松巡迴賽總冠軍。
