完賽獎牌@囉唆大叔
嗱嗱嗱！賽前都出咗通牒 (見《給街馬選手的最後通牒》)，點解跑友硬係要做錯嘅呢？
首先叫咗自己帶水杯水樽，唔聽唔帶，又搞到一地垃圾，要麻煩掃地大嬸清潔；跟住又投訴唔夠水飲，投訴講環保不如唔好搞跑步比賽。而我就做好榜樣帶定兩個500ml水樽，一個裝水，另一個裝電解飲品，放在腰袋，可以兩手fing fing輕鬆擺動，又可以隔幾個水站先至入水，唔駛同人掙崩頭，節省好多時間。雖然天氣係熱，水應該係要飲多一些，不過都要反醒一下自己嘅身體狀態、訓練計劃和賽前部署；要明白真正跑者係需要適應多變的賽道環境，才有資格挑戰極限。
我又提醒大家唔好亂掉蕉皮能量gel包裝，結果呢又係補給站後幾十米隨處可見，仲真係發現曾經被人踐踏過嘅蕉皮，橫屍路中心，死狀恐怖，不知那位跑友有冇跣鑊金呢？我都食gel，我都食蕉，負責任一點其實可以預算補給站位置前先食自攜的gel，咪可以將包裝放入垃圾桶囉！如果在補給站食蕉，可以食完半截快快掉蕉皮入垃圾桶，或者拎住成隻未開嘅蕉，等待適當時機先食，食完咪輕力拎住蕉皮搵垃圾桶掉囉！其實有幾難，又唔係拎住米田共，依家要用一百幾十個字嚟形容，好彩依家文字唔值錢，做紙媒網媒真係搵唔到錢啦！不過決定繼續做又堅持講真話嘅，又確係受人尊敬喎！
----- 廣告 Ad -----
突發事故現場@囉唆大叔
在賽道上還有很多人聽耳機，始終二三十公里的距離，唔係人人可以頂得順呢種孤單的感覺，不過如果可以讓自己的耳朵聽聽身邊跑友的呼吸聲腳步腳，或者少數旁觀人士的喝采聲，還有不同位置站崗的音樂演出者，這些今次比賽才有的悅耳歌聲，不是更加值得欣賞嗎？況且，在比賽途中，真的遇上有跑友受傷需要支援，用耳朵留意臨場指揮作出配合，唔係更加重要嗎？如果要自閉，倒不如返屋企瞓覺，何需天未光撲出郵輪碼頭，攞苦來呻呢？
樂隊落力表演@囉唆大叔
講番映相呢就真係乖乖冇咩人在賽道上急停，只是駛出真功夫，邊跑邊映，動感非常；而大會和自發嘅攝影發燒友又在不同景點擺陣，相信跑友呢幾天都要忙於在網上找回自己或朋友嘅靚相。
最後，終於衝過終點接過完賽紀念牌，大部分朋友的初次長途馬都能夠一一完成，成績達到預期。經過今次比賽，自己亦知道自己的弱點在那裡，可以對正下藥、重點鍛練，繼續為下個月嘅日本三連馬做好最佳準備。
蕉皮與益力多的交融@囉唆大叔
囉唆多一點，大會仍然沒有計劃週詳，只顧聽天由命；寄存行李位置好天曬落雨淋、跑友坐在硬崩崩的石屎地上、垃圾分類設施不足，蕉皮和益力多空樽是否可以分開存放呢？
----- 廣告 Ad -----
原文載於網誌 這是一遍融合人、大自然、生活態度與公義的樂土。
更多：
Fitz.hk Facebook專頁
給街馬選手的最後通牒
毅行賽後檢討
LT70都是一種練習
囉嗦大叔@Fitz.hk
Fitz Hiking 行山
