Photo: blogs.umsl.edu 中間藍衫就係Rae婆婆
參加過全美50個州嘅馬拉松，一共99場比賽嘅「婆婆級」人馬，將會喺4月12日參加人生第100場馬拉松，不過就令好多人擔心。
今年67歲嘅Rae Mohrmann，喺之前參加嘅99場賽事，74次打入分齡組別嘅三甲，所以大家並唔係擔心佢跑唔掂中途上車，而係擔心婆婆居住地方嘅治安問題。Rae住喺密蘇里州嘅弗格森鎮（Ferguson），呢個地方舊年發生白人警察擊斃黑人少年事件，引發一連串騷動。而身為白人嘅Rae屬於當地嘅「少數族裔」，所以佢出街練跑，唔少人都表示好擔心。
不過，Rae婆婆一於好少理，佢一直拒絕停操，每日都出街練跑，佢仲同阿女講：「我死後先慢慢休息。」
----- 廣告 Ad -----
Photo: KSDK
資料：USA Today
同場加映：Grandma’s Marathon
呢個係美國明尼蘇達州嘅馬拉松比賽，其實佢同婆婆一啲關係都無。比賽叫Grandma，原因只係第一屆有一間叫Grandma 嘅餐廳冠名贊助。比賽已經搞咗差唔多四十年，最初得百幾人玩，呢幾屆已經有一萬人參加，規模都唔細。
Sophia
平日打字多過行路，鍾意鍵盤多過跑鞋。成為跑手，全因古語有云：「女仔唔跑邊會靚？」