76年歷史日本琵琶湖馬拉松 2月上演最後一屆 精英長跑文化沒落?

日本琵琶湖馬拉松創辦於1946年，係歷史最悠久嘅日本馬拉松賽事，亦係第一項日本金級賽事，與東京馬拉松及福岡馬拉松，並列為日本三大長跑賽。不過，琵琶湖馬拉松於2021年2月28日舉行第76屆後，將完結歷史任務，正式告別。

終結原因1: 入場門檻太高

琵琶湖馬拉松一向走精英路線，參賽選手都要達到超高門檻 (男子):

• 馬拉松: 2小時30分內
• 半馬: 1小時10分內
• 30公里: 1小時40分內
• 20公里: 1小時5分內
• 10公里: 31分內

而近年馬拉松成為大眾運動，琵琶湖馬拉松這類精英賽事，開始失去了公眾關注。

終結原因2: 東京馬及大阪馬掘起

2007年及2011年創辦嘅東京、大阪馬拉松，迅速成為國際知名長跑盛事。東京馬貴為世界六大滿貫之一，大阪馬多達35,000名參賽者，亦成為全日本最大規模比賽。相較而言，琵琶湖馬呢類精英賽事，更難爭取公眾關注。

此外，論賽道受歡迎程度，東京馬經2017年改道之後，整體成績不斷進步，2018年設樂悠太及2020年大迫傑，都於東京馬創出日本全馬紀錄。而且東京馬及大阪馬等城市馬拉松，普遍較易獲得商業贊助，精英賽事經營變得困難。

終結原因3: MGC崛起

過去，日本馬拉松選手要晉身奧運或世錦賽等大型賽事，每年2至3月舉行嘅琵琶湖馬拉松，係取得入場券嘅最後機會。譬如話，2012年倫敦奧運以及2016年里約奧運，3名男子馬拉松代表都有兩名於琵琶湖獲得奧運資格。

不過，隨住3月舉行嘅東京馬賽道越改越快，以及2019年日本田徑總會JAAF舉辦「日本奧運選拔資格賽MGC」，琵琶湖嘅重要性大為降低。

資料: Association of International Marathons and Distance Races