多年來跑鞋都以高科技為賣點,邊對跑鞋令跑手跑得快啲,著得舒服啲,就會即刻熱賣。近幾年Nike憑住 Next%系列革新跑鞋科技,仲屢破紀錄。一直排喺第二位嘅 Adidas,似乎被打至透不過氣,不過有財經雜誌透露,Adidas 已經搵到挑戰 Nike 嘅策略,唔係同佢鬥科技,而係同佢鬥銷售模式。

Netflix 顛覆廣播業

業內人士形容,Adidas 計劃推出嘅銷售方式,為「Netflix模式」。串流平台 Netflix 絕對唔單止係視頻平台,只要你成為Netflix用戶,你對電影電視嘅口味、你收看節目嘅習慣,以至你搜尋嘅內容,都成為佢哋製作節目嘅依據。

Netflix 就用呢啲大數據,去制訂製作節目嘅題材等基礎。所以,佢哋不時會推出一啲小眾口味嘅節目,例如早年製作一套講香港抗爭運動嘅紀錄片《黃之鋒》,介紹一級方程式賽事紀錄片《飆速求生》,甚至翻拍日本另類動畫《齊木楠雄的災難》。相反來講,唔少大眾廣播機構要符合大多數觀眾口味,節目上要做到「一網打盡」,所以 CCTVB 為咗滿足大灣區觀眾要穿插 BBQ 大團圓結局嘅情節,或者《東張西望》要介紹拉絲口味嘅珍珠奶茶。

Netflix自家劇《小鎮滋味》題材極為另類,講述一位太太無緣無故變為喪屍,她的丈夫及女兒為咗要滿足太太慾望,不斷殺人供其食用。

Adidas 去年就推出「Futurecraft.Loop」,用呢一套 Netflix 銷售模式,去推廣佢哋嘅人性化跑鞋。

Futurecraft.Loop 跑鞋回收再做

呢項 Futurecraft.Loop 計劃,暫時只係試驗階段。運作方式大致係咁:

  1. Adidas 招募200位各個領域嘅專業人士
  2. 跑鞋依照呢200人嘅腳形、日常需要求,以及個人口味,然後採用3D打印方式生產
  3. Adidas 同時亦發展咗一間 Speedfactory,可以快速生產個性化跑鞋
  4. 當對鞋著舊咗著爛咗,將鞋入盒再寄返去廠商。廠商會依照之前數據造再造一對新嘅跑鞋,以郵寄方式寄畀客戶
  5. 製造過程重視環保,跑鞋用料會重用,以推廣「跑鞋重生」,減少棄置跑鞋。

Adidas 強調,佢哋呢項計劃絕對會針對唔同地區人士嘅生活習慣,以及環境而設計跑鞋。例如紐約人鍾意跑石屎街道,跑鞋保護性較強; 倫敦天氣差,跑鞋多採用鮮色系列。佢哋亦同時推出「虛擬實景」應用程式,方便用家足不出戶仍可挑選心愛跑鞋。

長遠而言,Adidas 希望將呢套銷售方式,轉為月費或年費方式,以維持用家對品牌的忠誠。

不過,唔少用家對 Adidas 採取觀望勢度,覺得佢哋未必可以提升用家嘅信心。畢竟呢啲只係改良銷售方法,跑鞋受唔受歡迎,最重要都係佢嘅功能。

資料: Fortune Insight

張伯倫
自細肥仔一名,後來因發現患有脂肪肝,決心多做運動注重健康,曾參加並完成毅行者,關注所有健康資訊。