HK Island 50 比賽日期係10月26日，對上次玩50公里嘅山賽已經係去年嘅「越嶺50」，果次嘅痛苦經歷仍然記憶猶新。話過唔會再有下次; 當然啦，之後咪又搵咗個原因再報咗個50公里嘅山賽囉!
今次嘅原因係乜? 咪就係今年四月玩左個 ActionAsiaEvent 攪嘅12K山賽，走愉景灣老虎頭山，覺得好正! 之後就搵埋另外三個人Ray、Ryan、Ronald，一齊組隊! 相信係一時嘅衝動，佢哋都應承咗。
之後，我哋就諗左個隊名叫「R4」。有兩個意思，第一係我哋四個嘅英文名都有個R字; 第二係「R」亦可以係「Run」，「4」英文可以讀「FOR」，四個人都可以有自己嘅原因一齊玩比賽，Run for 任何原因! 最重要係核爆都唔割!
----- 廣告 Ad -----
跟住就係要開始準備啦，本着「兄弟爬山，各自努力」嘅精神。我哋係無四個一齊練過嘅，而我嘅體能亦係四個人之中最差嘅，唯有將勤補拙，自己着緊啲啦! 所以我先後，試行過比賽嘅路段，分別頭段二十公里兩次，同後段14公里兩次。
另外，仲報咗一啲短距離嘅山賽，可惜喺唔同嘅原因下，全部都完成唔到! 係全部啊! 全部啊! 呢個真係一個好大嘅打擊!
比賽前一日，攞咗號碼報，再睇下比賽資料，呢次死得啦! 原來 cut off time 只有10小時! 仲話呢個係50公里入門級比賽? 無錯，路線及上落斜係相對容易，所以係入門級。本來以為嘅12小時內完賽，只係我一相情願嘅諗法! 咁唯有將「美食之旅」改為「地獄無間之旅」! 即係，可以跑嘅路段要跑，唔可以跑嘅路段就快行! 跟住仲定埋分段 checkpoint 嘅目標時間。
到比賽嗰朝，以為一切都準備妥當，突然發現隻錶冇電? 明明前一晚已經charge滿? 喺電光火石之間，立刻攞埋個尿袋出街，盡 charge 先啦。由於起跑時間及地點喺0700山頂廣場，最快最直接的方法係 Uber，仲可以喺中環接埋 Ryan 同 Ray，點知我就撳錯咗個掣，定左位係灣仔，好彩 Ryan 及時發現，都順利接到佢哋一齊去起點。點知，呢個時候Ronald就打電話嚟話:「你哋有冇帶水啊?」「起點係冇提供水呀!」「周圍啲鋪頭又未開!」四個人，就只係我有兩支500ml 嘅水。跟住就梗係小學數學題，四個人平均分配兩支500毫升嘅水，問每人有多少呢?
由起點到CP1，大約10公里，主要係落山，雖然有少少塞人，用左1個半小時左右，不過都比大會定嘅cut off time 早1小時到達；由於係參加隊制，等齊人先可以出發去下一個 check point，所以之後嘅路程，我哋都係四個人齊上齊落。
----- 廣告 Ad -----
由CP1去CP2，主要係平路，約有15公里。用左2個半小時左右，亦完成左一半既路程。所以，頭半程，總共用咗4個鐘頭多少少完成，都ok喎! 呢個時候，有隊員問:「點解我哋唔報24公里嘅組別?」「係邊個提議玩50公里㗎?」本着「不譴責、不篤灰」嘅精神，完賽後先再獨立調查啦。
補給完就出發去CP3，約有10公里，呢段路有些少上鈄，應該頂得住。不過，都唔可以掉以輕心。突然，有其他參賽者話CP3嘅 cut off time 係下午1時正，而我哋離開CP2嘅時間係11時15分，Fact Check 後知道係堅料，即係又要狗衝! 否則一定過唔到! 好好彩，最後一位嘅隊員趕到喺 cut off 之前到達! 但係同一時間，佢亦宣佈退出。因為佢知道自己嘅身體已經再無能力應付餘下嘅路程，為免攬炒，唯一嘅出路係「自撤」。我哋3R都支持同欣賞佢呢個決定。
之後，我哋3R繼續向CP4推進，中間要經過野豬徑，聽個名就知道唔係俾人行㗎啦! CP4係最後一個補給站，飲飽食飽之後。就開始打大佬，因為有三座山等緊我哋! 先上畢拿山，再過渣甸山! 落返去陽明山莊就係CP5。
CP5係終點前最後一個 check point，cut off time 係下午3:45，我哋係下午3:38到達。上埋最後一座山 – 紫羅蘭山，再由山腰返去黃泥涌水塘公園就完成！仲有1小時22分鐘! 隊友Ray已在眼前消失左，另一隊友Ryan就叫我唔好留力，去盡佢! 我心係咁諗，不過我個身體唔係好合作! 上紫羅蘭山嘅石級唔算多，但係點都好似上極都唔完; 不過，我係唔會驚㗎，因為之前已經探過路，所以都知道應該點樣分配所剩無幾嘅體力。
只要「不抽筋、不拗柴、不受傷!」就一定完成到，唔使DQ; 更加可以擺脫之前兩場比賽DNF嘅陰影，終點前2公里，係一段水泥路，只要跑到返去，就可以10小時內完成!最後，9小時56分31秒完賽。時間雖然唔完美，但係可以接受! 唯一美中不足的，就係唔能夠R4全隊完賽。
最後，好想多謝大口Sir、貴神、衡叔叔、恆爺、Franky、Kenneth、石師傅、Tim⋯⋯呢幾個月嚟，係唔同時候、唔同地點倍我一齊操山! 另外，就係三位隊友，齊上齊落。當然，仲有李太做最強後盾，操山唔同街跑，一操山最小失蹤半日，多謝您!
----- 廣告 Ad -----
呢50公里究竟點樣捱過? 點樣喺想放棄嘅時候仍然堅持?
邱吉爾講過:「堅持下去，並不是我們堅強，而是我們別無選擇!」
香港人加油!
共勉!
