相隔10個月後,再一次挑戰100公里 (HK100),繼2018年後第2次參與,同2018年路線,增加到103公里之外,整體爬升幅度增加到5300米。

由於今次係用12月後補身份參賽,練習同預備時間真係唔夠。結果跌出24小時內完成目標,只能用 24:58:51完成。

高手就分享比賽同訓練心得,作為慢腳的只能分享一下比賽經過同遇到的人同事。 HK100 真係一個好有氣氛比賽,由拎號碼布到比賽當日,工作人員同義工熱情投入,友善幫助,絕對係  HK100 喺香港大受歡迎其中一個因素。

沿途義工不停叫加油、加油,真係非常投入,仲會喺分差路口做人肉路障,擋住你去路,驚死你走錯。


去到 CP4 (榕樹澳) 時,坐低休息下,義工就拎住海藻飯糰比你,到 CP6 (基維爾營) 就比人問 are you okay (可能個樣太謝,驚我出事。哈哈),入到最後兩個CP,義工自動問你要唔要 fill 水同要唔要野食,真係服務周到。

今年沿途發現有好多支長炮 (攝影鏡頭) 喺賽道對住你,不論日頭,或者係夜晚 (突然連續幾下閃光,證明已經中槍了,辛苦晒一班不辭勞苦攝影師 (夜麻麻坐起山頭影相,好鬼凍架)。

師兄們互相鼓勵,就算本身唔認識,起山上都會互相鼓勵同支持下,點都會頂埋佢。今次亦唔例外,最後2公里,師兄叫住盡做 sub-25,結果呢2公里應該係整個 HK100 最快2公里。

最後要多謝大會喺宜家香港環境下,仍然克服困難堅持搞好 HK100,義工們無私付出。令到賽事順利,好期待下一個港百。


文章為作者意見,不代表Fitz立場。

歡迎投稿: https://fitz.hk/contribute/

廣告
偽鐵人
肥仔慢腳一名,幾年前突然愛上跑步, 由10K 去 全馬.又會參加山賽, 目標不求快,志在無傷無痛順利完成