[MidageRunner 的跑步存在主義] 我跑故我實實在在!

上星期我一個運動群組內，院友們在討論一篇關於跑步嘅網上文章，主題係 「幾十歲，你操到咁弗做乜啫?」，好多很多好很多唔運動或者唔多運動嘅人第一個反應一定係：「吸引異性搏女媾囉咪，超!」

作為一件業餘運動員仲要係中年業餘運動員，賓叔叔可以好很肯定話俾您聽，呢個係百份之二佰嘅謬誤! 再者，如果您認為一件中年阿叔無身家無地位無名車無豪宅，齋有身材有肌肉有型有款無現款而可以真係吸引到如花少艾的話，好明顯閣下同香港第七任港督一樣，係 Kennedy，堅．離．地!

中年男人之所以選擇做一件 MidageRunner 操 Fit 副偈，其實原因好簡單，宣之於口嘅表面動機係為咗健康同減肥，深藏不露嘅實情係用雙腳對抗中年危機，以身體變化身材改變重拾青春，揾番自己嘅存在!

你後生過我? 喂，我跑得快過你喎!
你架車靚過我嗰架? 喂，我 Fit 過你喎!
你事業成功過我叻過我? 喂，我跑得快過你喎!
你戴地通拿我戴卡西歐? 喂，我 Fit 過你喎!
你屋企大過我屋企? 喂，我跑得快過你喎!
你有錢過我仲要多好多? 喂，我 Fit 過你喎!
你靚仔過我高過我? 喂，我跑得快過你喎!
你好多女仔吼我得仔女吼? 喂，我 Fit 過你喎!
你乜乜過我物物過我? 喂，我跑得快過你 Fit 過你喎!
(乜乜 同 物物 可以無限延伸，歡迎自己填充!)

中年危機係一個牽涉生理同心理非常之咁複雜嘅問題，而相反跑步係一個好簡單嘅舉動，只要你肯跑，只要你用心跑，搵啱方法去練習跑，你一定會進步，進步多少視乎你嘅努力與決心，塵世間最公平嘅嘢就係運動! MidageRunner 同後生仔富二代新發財最大嘅分別，可能係佢對鞋三千幾蚊你對一千幾百，但再好嘅裝備都未必敵得過努力與毅力! 跑步練習其實好悶好辛苦，跑步其實係違反生理心理結構，特別係對後生仔，做人嘅目標係要舒服係要享樂，但跑步根本係攞苦嚟辛! 而做咗幾十年人嘅 MidageRunner 已經習慣捱苦，跑步需要嘅耐性同毅力通通有晒，而唔係年少青春嘅衝動!

每一個人都需要 Comfort Zone，中年人尤其需要，MidageRunner 嘅 Comfort Zone 就係跑步嘅時候，我哋好似不斷向前跑但其實我哋享受緊停留喺跑步中嘅結界！結界中我哋感受到存在，而且非常實在，仲使我哋身處一條紛擾嘅馬路，嘈吵嘅跑道上但都會感覺寧靜感到熟悉感到自我!

係咪好阿 Q? 係! 梗係啦! 阿 Q 到不得之了無與倫比，但做一件自我感覺良好嘅 阿Q MidageRunner ，又何妨?

成日有人話男人嘅浪漫就係豆腐火腩飯，太膚淺嘞!

蔡東豪先生話過：浪漫唔一定係詩情畫意，可以係一種性格一種生活方式一種心態，甚至簡單啲係一種行為，重點係浪漫嘅行為唔係刻意營造出嚟，而係隨心而發嘅自然反應，小至靜靜雞睇本書，大至嘈嘈閉追尋人生目標都可以浪漫!

MidageRunner 其實唔係用對腳跑，係用個腦用個心用個靈魂去跑!

MidageRunner 證明咗男人嘅浪漫除咗豆腐火腩飯，仲可以係「我係阿叔 但我跑得唔慢!」

更多：
Fitz Facebook專頁
從情緒低谷 再回到起跑線
有時間玩Facebook 無時間跑多K
Fitz Running 跑步