Support攻心 | 一家人齊齊整整返CP

有乜野會重要過日圓跌穿5.3、李強係理工讀過書、Do姐離開大婆台? 就係「一家人齊齊整整食飯」。「飯戲攻心」賣親情雞湯，幾萬年老字號，估唔到仲咁好賣。親情不同手機，不會用性價比量度，不求付出和回報相等，但飯一定準時開，擺明蝕水野，邊度仲會有 -「家」，唔到你唔起雞皮致敬。

同樣不是追求付出等於回報的，是做賽事 support。最近受 friend 所托，幫4男5女做50K solo山賽support，我都係 solo 一個人在 CP 做補給，有擔起一頭家的感覺。我自小行善積德的事情甚少做 (買六合彩唔計嘅話)，所以唔做唔知伏。

呢頭家品流複雜

Support 呢頭家有少許難度，因為9位跑手品流有少少複雜，大女是明星級的外星人，但有些是跑 50K 山賽的新手，有4位更是我素未謀面的囝囝囡囡，不過做得 support 就要負起責任，溫習了他們的照片幾遍認住唔認識的阿仔阿女特徵，千萬不能 miss 左。

CP 位係城門水塘燒烤場，是尾站，賽道第44K，好關鍵，跟住要打埋針山大佬至衝得線，距離終點約7K (在中途約25K有第一個 support CP，由我們的星級 supporter David 哥負責)。8點起步，家中大女應是第一個會到我的 CP，估計時間約是1230，1130在波蘿霸小巴站下車，咩一袋，手抽一袋，袋中共有2件華御結、3枝大水、4樽寶礦力、7瓶佳得樂、9條蕉 (求總重量)，慢行去燒烤場，發現今日地心吸力指數係紫色 – 極高。

1200去到 support 位擺檔，心諗一枝枝水，其實冇乜野要 setup，但睇見隔離的豪宅補給站，有地蓆、小型帆布椅 (閒閒地要等3-4小時)、噴水壺(可以幫跑手降溫)、撒龍巴斯、保冰劑 (冰敷完抽筋部位，又可以雪冰凍可樂)、蚊怕水…..，而我只有怕蚊的雙腿，其他的物資都冇諗過「係喎，要個喎」，不過好快原諒了自己 (是我的強項)，因為我始終是入世未深的 support 菜鳥 (乜野啫，樂悠咭持有者唔可以入世未深嘅咩)。

12時許開始有超級撒雅人的男跑手由麥六衝落燒烤場，揚起了一陣風沙。嘩，即係平均 pacing 每小時10K (乜野世界)，第一次在賽道見到這些星級跑手的正面，心諗洗唔洗咁輕鬆。他們過後，開始有等著仔女回家的感覺，約1245大女出現，大聲叫住佢，驚佢一陣風過門不入，詳細介紹了補給站提供的飲料和食品，大女好簡潔講左一句:「黃色，唔該。」收到，即刻攞左枝檸檬佳得樂俾佢，她接過後即走，又揚起了一陣風沙，好有 F1 跑車埋站換車呔feel，大女加油呀!

等了一小時都未有仔女到，但要守住頭家，唔敢行開去廁所。D仔終於出現，見佢蹦蹦跳，好有貨咁，佢話因為熱到 High High，叫我幫佢淋下水。係咪呢，如果呢個時候可以用個噴壺噴霧化水珠降溫，係幾咁pro嘅一件事。可惜我只可以攞起枝大水同佢照頭淋條頸同背脊，十分大媽幫阿仔沖涼。跟住打滿了兩個水樽，D仔仲要隊晒成枝佳得樂至上路，可見非常缺水，D仔加油呀!

幾分鐘後B仔來到，係第一次見面，不過我睇過相認得佢件戰衣。他見到我超開心，原來他開始作抽，又肚餓又缺水，於是立即搣條蕉俾佢，佢一路食蕉，我一路幫佢做人工按摩，密集啄下四頭，再用暗勁鍊下小腿，雖然手勢生硬，但B仔好似十分受用，大叫正呀。臨 say bye 前，佢仲堅持要同我 selfie，扮到好感激咁，我入世未深，也有點感動。B仔加油呀!

5分鐘後二女到，她在跑班是開3分尾披衝圈的女一，但跑50K山賽還是第一次，但見她輕輕鬆鬆，體力充沛，不用任何補給，交低個吉水樽，二話不說，飛奔向前。她身形雖然嬌小，但 turbo 強大，二女加油呀!

17分鐘後三女到，三女其實是50+的嬸嬸，而且長途山賽的經驗不多，想不到竟然與二女可以拉得咁近，而且沒有半點疲態，鬥志旺盛。加了寶礦力，取了蕉，沒有停下來休息，又往前衝上山，無論她的 look 和鬥心，與塵世間的嬸嬸拉不上任何關係，三女加油呀!

10分鍾後T仔到，也是未見過他的，只牢記著他在起點著件tee的顏色，可是他途中把上衣脫掉，赤著上身走過補給站，我miss左! 幸好腦海有一個hidden file突然被打開了，就是那副粗邊眼鏡，應該係佢啦。於是大叫T仔，他回頭過來相認，那一刻好像終於搵番一位失散了多年的親人，好開心。俾左條蕉同佳得樂 (唔明點解呢班來自唔同原生家庭的仔仔女女，都好一致要飲佳X樂)，T仔加油呀!

12分鐘後L仔到，個樣好生意失敗，原來在半程他已經腳痛，但佢冇下台，堅持走下去，雖然途中仲俾三女嬸嬸鎅埋，但佢受得起這份打擊，堅持走下去，終於走到我的面前。我扶他坐下，密集啄他的四頭，當想摸下他的小腿時，他立即大叫: 唔好，因為堅痛，估計是拉傷了筋肉，於是只輕輕按摩。吃了蕉，飲左佳得樂，休息了數分鐘，回魂過來。我拍拍他的膊頭，俾左個任務佢：要完成! L仔點點頭，俾左OK手勢加堅定眼神 (好鬼man)，L仔加油呀!

其實最令我記掛的，是四女和五女，都是我不認識的年青女生，她們少玩山賽，50K是初體驗，目標不是做時間，是完成。她們一直都落在大後方，她們在中途 David 哥的補給位已經好攰，擔心是否能夠完賽。幸好分別在20分鐘和30分鐘後都安全到達補給站，雖然疲累，但精神飽滿，見有攝影哥哥，也識得高舉雙手扮「我無野」。因為是女生，我特別用心鼓勵她們，她們吃過蕉，飲過佳得樂，甜美的笑容又回來了，四女、五女加油呀! (呢次用真感情)

一家人齊齊整整返CP

最後大女攞冠軍是意料中事，三女嬸嬸在組別也得第一名，成績理想。其實最重要的是9位仔仔女女都順利衝線完賽，他們也十分生性，在群組交足感激戲，L仔更說，冇你地就冇今日嘅我，雖然浮誇，但踫巧我也是膚淺的人，受晒，令我有被需要的感覺。

原來我在補給站不經不覺站了3小時，但一點也不覺得累，做 support 的，最開心的是見著一家人齊齊整整返到 CP，吃蕉和飲佳得樂，給力後，「打開門，行出去，去遠啲!」

彩蛋

渣馬取消是命運，東馬抽中是緣份!