大家好! 又係我 [email protected],今次同大家介紹例跑嘅重要性同邊度可以參加。

相信各位都經常去行山同跑步,尤其是而家非常時期,保持身體健康非常重要。但發唔發覺,一班人一齊跑點都好玩過自己一個呢? 正所謂「獨樂樂不如眾樂樂」,老老實實,自私跑有咩好玩吖? 一齊訓練,一齊休息,識返幾個新朋友,再食個飯 (雖然依家可免則免),絕對可以幫我地去舒緩身心同埋調解每日面對肺炎嘅緊張情緒。

當一班人帶起你披醒,又或者一齊互相鼓勵嘅話,你點都會跑得遠啲。相反,你自己一個跑,你未必會跑完你想要嘅距離或者速度。如果係一班人,就會覺得跑得順啲,又或者唔會咁快想停。

你自己練習嗰陣,你未必會有閑情逸致去探索唔同嘅路線同難度,可能選擇去麥徑8778或者去運動場做隻倉鼠跑就算。但一班人去練習,就可以探索唔同路線或訓練內容,增加訓練嘅刺激性。而且仲有個推動力令你持之以恆咁去操練。

講咗咁耐,其實今次就向大家介紹 TGR 嘅例跑活動。我哋逢星期一同星期三都會喺港島進行晚間越野跑。

想唔想知 TGR 星期三晚例跑其中一條路線係點嘅呢? 一齊睇吓先:

首先喺香港公園開始,然後經半山去石塘咀上龍虎山,再經港島徑到薄扶林水塘,再沿香港仔郊野公園經水塘、黃泥涌同寶雲道返香港公園。

而星期一嘅路段通常都唔同。雖然無特定嘅地方,不過勝在有挑戰性同可以試新嘅訓練方式。

參加TGR嘅例跑仲有一個好處:有得世界各地嘅朋友參加,你可以一邊練跑,一邊練英文同擴闊國際視野,一舉兩得。

心動? 記得睇吓我哋下次例跑係幾時喇! 約定你!

The Green Race HK Facebook專頁
The Green Race HK 網站


文章為作者意見,不代表Fitz立場。

歡迎投稿: https://fitz.hk/contribute/

廣告