Fitz > 運動 Sports > 跑步 Running > [The Green Race] 世事難料

世事難料。新年流流冇人會預料到肺炎襲港,仲要散播去全世界。依家個個 work from home (or hills)、攬炒潮繼續,想跑個步都提心吊膽,日日出街都要數口罩,好似以前撳F5搶比賽位咁 mon 住 po隨時兩盒thx (下刪一萬字)。但就好似出咗 CP 發覺隻腳唔掂都路都照行頂硬上,日子都係照過㗎。

就好似早前我地嘅 Gold Coast Green Race 一樣,用咗好多心血同時間,希望五湖四海嘅跑友一齊享受香港黃金海岸同掃管笏嘅風景。可惜事與願違,比賽加入咗攬炒行列,老細 Martin 仲好唔開心添。
本來諗好咗點退錢,但好在忽然有個諗法,叮一聲「攬炒咋嘛,自己跑咪得囉!」

如是者,Green Race 第一屆 Strava 大挑戰就誕生了。最應景係仲要每個參加者都送一個四層活性炭口罩。

突然老細又有主意:「咁倒不如原定比賽嗰日一齊自私跑吖!」

公告一出,其實團隊嘅心情都好忐忑,唔知跑參賽者會唔會接受呢個攬炒安排。好開心見到 Facebook comment 都好正面。

總算鬆一口氣。

到原定比賽嗰日,雖然冇CP、冇拱門、冇義工,但係有五十 (係五十!) 個參加者一齊等起跑,仲有幸見到曾小強一家出席添!

開始時一刻:

其他靚相:

 

有咩開心得過,抗疫艱難時期,大家一齊跑一轉,吸收新鮮空氣呢! 無論以後日子有幾難行,我哋都會抱住跑山嘅決心,開朗心境堅忍面對。記得注意衛生,有健康就使乜加持口罩睇龍珠吖。但跑前跑後帶返口罩,着多件衫勤洗手,仲要記得帶返走自己個口罩。記住個山係大自然㗎。

The Green Race HK Facebook專頁
The Green Race HK 網站


文章為作者意見,不代表Fitz立場。