UTMB 2022．61歲「毅行先生」KK陳國強復仇成功，37小時19分49秒完賽

61歲的「毅行先生」KK 陳國強，於 UTMB 賽事以37小時19分49秒完成171公里，排名為74位，在男子60至64歲組別排第9位，亦係比賽之中第二位香港華人衝線。對於征戰多年嘅越野跑老手，成績不算標青，但事實係，比賽歷時三十幾個鐘，每分每刻都令關心 KK 嘅支持者緊張不已。

原因之一，係 KK 於2019年首度參賽，遇到天氣不穩，KK 戰至150公里因低溫症出現神智不清，仲同工作人員講要「截的士返沙田」，最後被逼「剪帶」棄賽，為 KK 越野跑生涯一大憾事。所以呢次為 KK 打點一切嘅支援人員，沿路都不敢抬慢，細心留意 KK 狀態。今年當 KK 踏入 U14 Vallorcine 檢查站 (約153公里處)，都令在場支援隊鬆一口氣，而且終點在望，大家都相當興奮。

此外，熟悉 KK 嘅朋友都知道，KK 雖然對山野環境駕輕就熟，不過今次其中一個敵人就係要「捱夜」。KK 每次出戰樂施毅行者，都在十幾小時內就完成，不需要捱眼瞓。呢次171公里 UTMB，由於係當地晚上六點起步，KK 難免要捱夜兩晚，容易被睡魔折磨影響表現。好彩，最後 KK 雖然出現疲態，不過仍然安然走過所有路程，成功抵達終點。

享受比賽令人佩服

相信唔少人喺本地山賽遇過 KK，而佢最令人深刻嘅印象就係認真比賽，認真訓示學員嘅態度。KK 雖然唔會「黑口黑面」，不過比賽時一臉認真，真係好少見佢展露笑臉。呢次由 UTMB 實地傳來嘅比賽相片，唔少都見到KK笑容滿表，更會同在場觀眾擊掌打氣。

KK一向推廣無傷無痛嘅比賽哲學，亦強調參加比賽要以享受為先，雖然現時我哋同KK相隔半個地球，但真係可以感受到佢呢份喜悅。