循環泳線七不思議事件

無游開水又或者比較少游公共泳池，可能未必知咩係循環泳線。一般由康文署管理嘅公共泳池，若然有主池的話，都會响中間拉出兩條泳線，供快游或無間斷游泳嘅人士使用。分出黎嘅兩邊，一邊會係有4至5條線闊嘅公眾暢泳區，有人喜歡稱之為「公海」，原意係畀大眾寫意咁慢游。另一邊係佔2至3條線嘅團體租訂區同埋一條線嘅公眾授泳區，其中團體租訂區係優先畀一眾體育總會/協會/泳會預訂，用黎舉辦活動/訓練/泳班，而公眾授泳區就係畀租唔到線 (呢樣都好平常，因為本身都爭崩頭) 而要進行授泳既人。

而泳池中最令人費解嘅事往往都响呢兩條擠擁嘅泳線上面發生，以下只係精選其中七樣，實際情況未能盡錄。

一. 循環按摩池

使用循環泳線嘅Rule No.1，就係「在循環泳線內應持續游泳」，基本上如果預左停低休息，除非只係好短時間，否則都應該先離開泳線。可惜嘅係，經常性會見到4-5個人响兩邊盡頭一字排開 (甚至兩排)，形成堅固嘅人牆，然後好似享受緊按摩池一樣，挨住池邊吹水聯誼，談笑風生，逗留好幾分鐘甚至更多。其實要浸下水，放鬆下，大可去公眾暢泳區，浸幾耐都唔會影響到人。

二. 論武功，俗世中不知邊個高

不過，原地不動企响度封住池邊，都未夠呢兩位高人強大。筆者就見過有位前輩，氣定神閒咁坐响循環泳線池邊上，只將雙腳垂下水中，然後施展連環打水腿法，所有人見呢位前輩腿功了得，未到池邊都要退避三舍。另外，又見過一位世外高人，以單手反手向後捉緊池邊，整個身體同腳都瞓响泳線繩之上，然後用另一手悠然撥水。呢個情境筆者覺得好眼熟，無錯，就係神鵰俠侶出現過嘅小龍女瞓繩床！喎一刻，不期然响腦中哼左句歌：情若真，不必相見恨晚⋯⋯

三. 我姓游，叫半池

標準池嘅長度為50m，而循環泳線使用者，因為要持續游泳，最基本都應該輕鬆游到呢個距離，但係不時會見到游到一半就無以為繼停低嘅人。咁當然一次半次人人都可能有，但如果連續好幾次都係咁，為左自己同其他人嘅安全，真係要檢視一下係咪有足夠能力應付50m距離。更離譜嘅係，見過有人每次都用行同彈跳嘅方式，慢慢去到池嘅中間先開始游水，然後游完25m又停低。如果要咁辛苦，點解唔去游25m長嘅訓練池，係都要走入黎循環泳線冒險？

四. 鯉躍龍門

大家有睇過游泳比賽的話，都會見過選手由起點跳台，一躍而下跳入水中嘅英姿。或者好多人都想一展身手，但呢種跳水方式只係適用於無乜人嘅地方。試諗下，泳線本來已經多人，呢個時候粒聲唔出由高處跳落黎，其實同買鋪大細一樣，只係50/50搏下會唔會撞到人，又或者搏下附近嘅人反應係咪真係咁快避得開。要知道跳落黎嘅重量同速度，帶黎嘅傷害同平時一般身體碰撞完全無得比。好彩嘅係，做出呢啲咁危險行為嘅人尚未算好多，但令人受傷嘅野，真係一單都嫌多。

五. 破冰轉身

游泳池長度有限，要繼續游落去，當然要轉身啦。坊間有好多轉身嘅方法，但都係面對同一個問題，泳線人數眾多，愈大動作嘅轉身，就愈容易打到其他人，所以適當嘅幅度調整係好需要嘅。最重要嘅係，當由池邊彈出時，最起碼都要望清楚前面有無人。可惜依然有部份人為求一兩秒快感，望都唔望下就飛射而出，結果就只有令人捱撞嘅份兒，傷人傷己，為咩呢？唔通咁樣就練到破冰轉身?

六. Mario Kart 蛇行

有玩過以前 NDS 嘅孖寶賽車，就知道以Z型路線行走，係可以令架車加速，但係游水係唔 work 嘅。一條循環泳線正常黎講係可以容納到3個身位闊度 (摩利臣山呢類8線變10線嘅池除外，可能得番2個半身位)，而規則上係要使用者盡量靠左邊游，理論上中間係會有一條路可供閃避或適當爬頭之用。不過，由於游背泳無向前嘅視角，除非本身技術有一定程度，否則你就會見到一架不停游走左中右3個身位嘅倒車，加上向兩側延伸拍打嘅手 (正常背泳係唔會嘅)，撞擊拍打經過嘅所有泳客。响循環線內遇到咁，基本上係無其他位走，就只有硬食。

七. 豁出去慢游

戴定頭盔先，筆者絕對唔係游得好快嘅人，而且快慢係相對嘅，有人話50秒游50m係快，但有人話要30秒游完先叫做快，所以根本係口同鼻拗。其實只要察覺自己速度比其他人慢，盡量靠住最左邊黎游，唔好閘住中間，讓出通道就已經 OK。感覺到或睇到後面有更快嘅泳者，不妨稍稍減速，其實要過你頭都只不過係一兩秒嘅事。不過都試過遇上相反做法嘅人，游得比線上任何人都慢，卻又堅持游响正中間半步不讓，結果成線泳線兩個方向都畀佢一個人 block 晒。有時仲會有見你爬頭就加速阻擋嘅奇人，不過都算係少數。

當然，以上嘅行為，其實只係欠公德而無干犯任何法律，嚴格黎講，你係奈佢唔何。甚至有人會話：「我有畀入場費架，點用係我嘅事，你咁叻咪去私家泳池游囉！」而歸根究底，人太多地方太少，先係一切嘅爆發點，而呢樣嘢似乎响香港唔會有輕易解決嘅一日。呢啲磨擦，可能係無日無之，所以我寫呢篇野並唔係想大家用仇恨去面對，相反地只希望每個人，都可以多啲顧及一下周圍嘅人，响正確嘅地方做適當嘅事，少點自私，多點公德，呢個世界或者已經美好得多。祝大家何時何地都可以游得愉快、游得身心都安泰。

Fitz 連結: https://fitz.hk/?p=101211