第一次踏進中國大陸賽事
感謝這次旅程的舉辦單位
(包食包住包交通包機票包玩 )
機會真係唔係成日有,感激不盡

我地不平凡的之旅經歷開始

7月21日 星期五 香港出發

先坐港澳車到深圳寶安機場 晚上9:15pm機 (中途過關用左20-30分鐘左右) → 晚上11:55pm到達西安咸陽機場。

星期六早上先,再係西安機場早上7:55出發上機,所以喺咸陽租酒店訓左3小時 (酒店歷險記,上網訂酒店時,間酒店寫明距離機場100m,但我地落地 Google 時就寫喺機場,但搵唔到。之後打電話聯絡酒店,酒店話接我地,等下搞下一大輪之後,2點半先到酒店,原來酒店同機場有1、2km,上網租嗰間同佢帶我地去個間個名完全唔一樣,一間係酒店,一間係賓館,但房就同上網睇相一樣,所以最後唔理快速訓三個鐘,但老闆4點50分已經第一次 Morning call) → 5點50分上車出發。

7月22日 星期六 內蒙古


早上7:55飛機,6點已到西安咸陽機場,但…又一次有災難,由於我喺上網訂機票時,打錯其中一隊友名字(LAM → LAW),要即刻打電話訂票公司,上網幫忙改個名,好彩最後順利早上9點20分到達烏海機場(內蒙古) → 但未完…仲要坐多一個半鐘車到 內蒙古 磴口縣。

我地終於到比賽地方,今次主辦單位好好,由落地全程都由大巴接送,食飯、報到、返酒店。食飯地雖然每次同一個地方,但我覺得有得食已經好好,有時有啲好特別菜式,每次都係嚟5至8碟前菜,加水果盤,之後先再上6至10碟主菜,大部分係辣,食飽晒喇,先最後上白飯。報到、砌車、試車,一個晏晝搞掂,夜晚10點瞓覺,第二日比賽

7月23日 星期日 內蒙古 比賽日

7點酒店出發踩5km到比賽場地,報到拎晶片、泳帽。轉項區8點15分關閉。

一直等,原本8點30分開賽,由於等啲官員黎,最後9點30先開賽 但等既過程,無工作人員會講話遲開賽,大家就企住等、最後大家先坐,因為比賽隨時開始。

游水

落水開始,但捉住浮台邊開始,喺黃河游,五指不見、只見黃水,水溫應該24、25度,但我覺得凍,因為有排水位,所以有啲位置好大流,平安上水就已經足夠,但我飲左好多水。

中新網圖片

上水跑100m左右就到轉項區。

單車

踩兩圈 每圈20km,單車路兩條公路全封、頭10km每隔20m一個警察,起碼超過100個警察,40km入面,有30km係逆風,前一日簡介會話唔可以跟車,但我觀察過後係無人理,有工作人員都好,但只睇住人跟,唔會捉人(中國大陸係咁架喇)。

跑步

跑4圈,2.5km一圈,沿住個湖邊跑,平均keep住好開心。兩邊好多人打氣,真係去到邊個位都有聲「加油」。

最後奪得女子20-34歲組第三名。

中新網圖片

比完賽周圍搵野食,行左10至15分,搵到一間當地飯店,四道菜:紅燒肉、羊、炒菜、蕃茄蛋 幾好味既。

夜晚食飯頒獎,但落雨,所有野搞到好亂 (上車避雨、落車、過另一部車,話係車上頒獎 、再落車,上台全部人一齊拎,落台全部人一齊自己搵返自己個獎杯)。夜晚返到酒店,有個情景就係比賽先會發生,每個運動員都打開房門,砌車。我地個層包括台灣、澳門運動員。係幾開心,齊玩齊傾。

7月24日 星期一 返港

早上6點50酒店出發烏海機場。

我地登機好順利,存放行李同單車都無事,準備入閘過關,工作人員話我地護照唔可以用黎出境,明明飛黎烏海無事,出境竟然出事,之後搞完一大輪,有個大粒少少既人就話今次比我哋過,好彩可以準時上飛機。

11點50到達西安機場,食飯、登機,事情再一次發生,話護照唔能夠登機,要我地將機票上號碼,由護照登記號碼改為回鄉證號碼,好彩係另一個櫃檯可以即時處理,都總算可以即刻處理到。

晚上7點40分到深圳寶安機場,再坐港澳車回港。

一次速去速回之旅,真係要多謝 Jason 及其他同行朋友

另外,下次返大陸比賽既人 記住兩件事:

  1. 要有一咭兩號電話,可以係大陸打電話
  2. 要用回鄉證買大陸機票 (好重要! 好重要! 好重要!)

內蒙古之旅完結! 期待下一次!

Tsang Ka Hung 曾嘉紅 Facebook專頁


更多:
Fitz Facebook專頁
[Ironman Cairns 226] 黐纏戀後廢枕忘餐奮力追求嘅三個數字!
十個關於三鐵的問題
[Road to Ironman] 我加入了一個邪教叫 MidAgeOnG
Fitz Triathlon 三項鐵人

廣告
曾嘉紅
人稱「紅爺」,2013年第一次參加三鐵賽,在台灣墾丁的70.3鐵人奪得季軍;2014年「台東鐵人三項錦標賽」,於年齡組別中得到亞軍;2015年「越南峴港鐵人三項錦標賽」,勇奪冠軍,取得世錦賽參賽資格。其後因受傷等問題,沉寂多時。2017年捲土重來,成績有望突破!