[Plogging 環保慢跑熱] 邊跑邊執垃圾

跑步時拎個袋喺手，邊跑邊執垃圾，在西方已成為一個流行活動。

香港山界一直都有班有心人默默耕耘，身體力行去保護環境，山系‧清道夫 Wild Sweeper、清徑先鋒Trailsweeper可說是當中表表者，當然還有不少山友自發上山下海執垃圾，佢哋嘅義舉亦令人肅然起敬。

行山之外，跑步又可唔可以同時執垃圾呢?

大約三年前，瑞典人 Erik Ahlstrom 由小鎮搬到首都斯德哥爾摩定居，第一時間畀呢個城市嘅垃圾大吃一驚。Erik 決心要將自己居住嘅城市變得更好，就喺跑步時順手執垃圾，並創造「Plogging」呢個詞語，結合咗瑞典語 plocka (執垃圾) 同 jogga (慢跑)。Plogging 隨後成為城市流行運動，並由北歐傳至整個歐洲，期後傳至亞洲。

有專家計話，一般慢跑平均每小時可消耗235大卡熱量，但 Plogging 平均每小時可消耗288大卡。而且，執垃圾嘅動作類似深蹲 (Squat)，能鍛練核心肌群，所以多做有益。

至於中國，Plogging 最近亦成為熱門關鍵詞。原來早前國家競走運動員王麗萍在社交網站發帖，講自己邊跑邊執垃圾嘅經過。呢個故事，受到媒體廣泛報道，連大陸官方媒體《人民網》都發表文章，介紹呢項活動，更鼓勵國民多多參與。

至於有官媒鼓動後，Plogging 會唔會成為中國熱門活動呢? 筆者唔係時事評論員，唔敢下判斷。不過無論係瑞典人 Erik 決意邊跑邊執，定係香港山友上山執，動機都係出於對居住嘅城市嘅愛護，點都值得鼓勵嘅!

Fitz 連結: https://fitz.hk/?p=101454

更多:
Fitz Facebook 專頁
香港運動比賽時間表
Fitz Running 跑步