[雷利衛徑長征2018] 終結那不能完成的惡夢

雷利衛徑長征2017

上回提要，上年我地第二次參加雷利，因為颱風關係，大會腰斬左比賽，原本以為咁無左個獎，而大會亦好好，係稍後既時間根據腰斬時間既排名照樣頒獎，我地亦成為雷利長征2017混合組別第三名。縱然拎到獎，但係未能夠完成雷利比賽呢條刺已經深深地刺入我地心入面。每次行經衛奕信徑都不禁調侃自己衛奕信有幾憎我地…

雷利2017第三名獎品

一年容易又雷利，一到報名之時，我地二話不說就即刻報名，決定再三挑戰雷利! 我地對不能完成既恐懼已經去到迷信既地步，因為前兩年不能完成都係小弟做隊長，所以隊友一致通過“篡位”，換隊長…..到拎號碼布嗰日，我地發覺今年同上年個參賽號碼係一樣嫁! 可能係個天都想我地完成返!

要幾幸運先會兩年同一個比賽號碼!

喺比賽前一個月，超強颱風山竹襲港，嚴重破壞香港既山徑，原本都唸住兇多吉少，可能要改期/取消，多得大會和各相關人等既努力，比賽可以如期舉行，只係唔再係衛徑長征，而係衛麥交替。不過不得不讚大會喺改道上係有心!

比賽前一星期練東洋山仲封梗，點知比賽唔洗行

終於去到10月13號既比賽日，我地再一次回到熟悉既起點。今年天氣雖然無上年咁涼快，但係都時陰時晴，算係比賽既理想天氣，至少唔會再因為天氣既關係而完成唔到! 一如以往，我地執下野又影下相咁，好快就到比賽開始。

SKBJ 起點合照

比賽之前我地都無唸過要做咩時間，目標只有一個，就係跨過終點線! 我地一路按住自己既步伐去呢條雷利特別版! 唔洗上東洋固然令人心曠神怡 (您懂的XD) ，見反獅子畢架針草呢啲老朋友又好可恨!

比賽既沿路support!皇帝既享受

去到太和既補給站，手錶資料顯示累積攀升已經去到2800m，大會公佈總攀升係3300m，換言之只係仲有500m，心唸: 輕輕鬆鬆啦! 點知係惡夢既開始! 可能入左夜啦! 落完坑山之後既路悶到不得了，好似入左結界咁，點都行唔完…去到最後既華山軍路仲慘烈，大上大落，港版萬里長城唔係浪得虛名，說好的170m呢?! 經過一輪精神既折磨，我地終於返到終點! 時間係15:57!

衝線一刻，如釋重負

按圖放大

雖然話就話係終於完成左雷利! 但係無左東洋八仙既雷利，又好似有啲過唔去。將來有機會再真真正正將真．雷利再完成一次啦!

呢到想好好多謝山路同盟既咁多位兄弟姐妹! 不論係物資上既支援定係言語上既支持，都帶比我地好大既能量! 以跑會友，夫復何求! We are a family!

山路同盟! 跑山又跑路

Fitz連結: https://fitz.hk/?p=105323