小弟是一個今年即將畢業嘅博士研究生,一直熱愛跑步,參加過很多大小賽事,唯獨「毅行」一直無緣。大家都知「香港毅行」可說是香港甚至世界一年一度嘅盛事,每年都有十幾萬人報名,最後被抽中嘅機會,可說是比中六合彩還要細。好似上年,我已出動全家總動員幫助,但最後都係落籤。

不過對我呢個跑者來說,「有志者鄧竟成」是世上不變嘅定律,我又點會咁易放棄呢。所以,今年我再接再勵,終於,在六月頭傳來好消息!「媽!我終於得左嗱!」當知道中籤後,我二話不說,立刻通知我三個隊友,組成隊伍「2XJ」,就咁樣,我地懷着既興奮又期待的心情開操!

%e5%8d%9a%e5%a3%ab%e7%95%a2%e6%a5%ad-vs-%e6%af%85%e8%a1%8c%e8%80%85-1
三十幾度炎夏行「針草帽」

從夏天起,我三個隊友都一直陪住我練山,三十幾度炎夏的「針草帽」真係令人一世難忘,我地四個一直努力練習,因為我地有個目標:「希望24小時內完成100公里」當大家雄心壯志地向着目標前進,突然,係比賽前一個月,收到了一個消息,令我陷入極度兩難嘅狀態之中。

「各位畢業生注意,本年度的畢業典禮將於11月18日 下午3:00 舉行…」….望住電郵嘅一刻,我腦裡一片空白…博士畢業VS毅行者…「手掌係肉,手心又係肉」..點揀…心諗:唔通我都係逃唔過做唔到毅行者嘅命運…當我將呢個消息話比隊友知時,佢地竟然冇半點怨言,更安慰我話:「我地一齊參加完你畢業典禮之後,先再返起點出發咪得羅!」「但我地原先12點半出發…咁樣我地一定冇可能24小時內完成架喎…」我無奈地說。但佢地話「唔緊要啦,時間都唔係最重要,最重要係你可以參加到畢業禮,而我地四個又可以一齊完成毅行呀MA!」聽到佢地咁講我真係好感動,果刻我體現到「能成為隊友大概總帶着愛」這句說話。

比賽當日,登記完之後,接近12點半時,我地亦同其他參賽者一齊上線,踏過計時板,不過我地冇同佢地一樣向前邁進,而係繞過燒烤場回頭走,一行四人一齊返回科大參加小弟嘅畢業典禮。

0616登記完成
0616登記完成
2XJ同其他參賽者一齊上線
2XJ同其他參賽者一齊上線
%e5%8d%9a%e5%a3%ab%e7%95%a2%e6%a5%ad-vs-%e6%af%85%e8%a1%8c%e8%80%85_07
在毅行起步之後,我回到大學行畢業禮,並與朋友合照。

由於畢業禮的時間頗長,我嘅隊友因為等我都等到訓晒覺,真係辛苦晒大家… 大約四點半,畢業典禮終於完結,我亦極速變裝,聯同我三個隊友即刻飛的返回北潭涌起點起步。於下午5:15,我地「2XJ」正式出發!

隊友們等我等到訓着覺
隊友們等我等到訓着覺

出發後,沿路一直都只得我地四個「傻仔」孤獨地走着,無幾耐,突然有架車駛向我地,裡面嘅人突然拉底窗問:「睇號碼布,你地應該12:30pm出發架喎,點解宜家仲係北潭涌?你地四個去左邊呀?」原來呢架係「掃尾車」,我地向工作人員解釋左我地的情況後,過左一陣,車上既工作人員突然同我地講:「你地上車啦!我地車你地去浪茄。」下!?上車!?雖然我係遲左好多出發,但我唔想搭車喎….再過多一陣,工作人員再一次叫我地上車:「我地同大會講左你地既情況,大會非常理解,批准你地上車亦唔會取消你地資格,等我地車你啦,我地驚你地趕唔切去CP1呀。」個刻我覺得,如果件事係真既,我好開心大會比呢個特權我地,但我玩得毅行又點會想搭車呢?!而且我三個隊友都好支持我,所以最後我地都拒絕左大會,希望用自己對腳去完成呢100公里。%e5%8d%9a%e5%a3%ab%e7%95%a2%e6%a5%ad-vs-%e6%af%85%e8%a1%8c%e8%80%85-6

「掃尾車」一直緊隨住我地
「掃尾車」一直緊隨住我地

因為時間緊迫,我地就開始跑去東壩,而「掃尾車」亦一直緊隨住我地尾。我地慢時,佢就慢D,當跑得快時,佢就開快D,原來咁樣比車係後面迫趕住,其實都真係幾大壓力。用左一個小時多少少,我地去到東壩,原本我地都預左呢個水站應該完左,但估唔到工作人員知道仲有最後一隊黎緊,竟然等埋我地,好好咁預備好晒啲水比我地繼續上路,仲不停叫我地要加油趕去CP1。

終於,係晚上7點52分,我地成功抵達CP1,Check-in後我地立即就繼續向前走,走到赤徑,我地已經陸續見到其他參賽者啦!「我地四個終於返回毅行者嘅大隊啦!」另一邊廂,係CP2嘅Support Team 亦都等左我地好耐,所以我地加緊腳步,係晚上9點23分亦抵達CP2,同Support Team會合,佢地等左咁耐見餓,仲就地煮煲仔飯充饑!勁呀!

Support Team 隊長正在煮煲仔飯
Support Team 隊長正在煮煲仔飯
2XJ 與Support Team 大合照
2XJ 與Support Team 大合照

食過飯之後,同Support Team道別後又開始上路,沿途我地四個有講有笑,互相支持,互相鼓勵,心諗我地可能係整個山頭最噪嘅的一隊,哈哈。經過「牛雞馬」、「針草帽」同令人意志消磨嘅9、10段,最後我地以大會時間31小時6分鐘Full Cert. 完成呢次毅行者,雖然今次同目標時間有啲距離,不過最重要都係能夠full cert完成!



2XJ終點合照
2XJ終點合照
2XJ Full Cert. 完成毅行者
2XJ Full Cert. 完成毅行者
起點到CP1相隔7個幾鐘
起點到CP1相隔7個幾鐘

我希望再一次多謝我地嘅Support Team,無你地,我地唔會咁順利完成,仲有最重要就係我嘅三個好隊友Juno,Johnny同Kinwai!多謝你地嘅愛同包容,願意一齊參加我嘅畢業禮,之後等埋我先一齊出發,完全冇諗過無遺棄我!我地四個仲已經約定下年再報名參加毅行者,容我再講多次「能成為隊友大概總帶着愛」,希望「2XJ」下年再有機會同大家一齊努力!

完成毅行已經一個星期,依家每次睇返我地用左7個幾鐘先去到CP1都會會心微笑,2016年11月18日亦成為我人生中非常重要嘅一日 — 博士畢業 + 完成我第一次毅行者。

更多:
Fitz.hk Facebook專頁
[毅行者後記] 寫給自己的戰書
[毅行者2016] 終點必定是美好的
如果未能遇見神,就在毅行者去找吧 (上)
Fitz Hiking 行山

分享
蘇兆俊
我叫蘇兆俊,跑齡正式踏入等三年。三年前經朋友'引誘',跑了第一個10k,苦不堪言。到現在不但減去40磅,更已經完成了四隻馬。一年前更接觸了跑山,參加了雷利,環島行和毅行者。現在是典型跑步成癮,唔跑唔舒服。