[毅行者後記] 寫給自己的戰書

由

2016-11-27

Fitz > 運動 Sports > 行山 Hiking > [毅行者後記] 寫給自己的戰書

%e6%af%85%e8%a1%8c%e8%80%85%e5%be%8c%e8%a8%98-%e5%af%ab%e7%b5%a6%e8%87%aa%e5%b7%b1%e7%9a%84%e6%88%b0%e6%9b%b81 — 本文作者潘潘 (左)

寫一封給自己的戰書，紀錄自己的成長。

毅行前
半年前我對參加毅行者暴走100公里呢件事，簡直覺得是mission impossible 。因此，當資深毅行朋友加教會弟兄叫我抽毅行時，因膽怯而無接受勸勉，令到半年後竟然完成到呢個不可能的任務既我非常後悔當日唔聽話(即使可能抽左都唔中)，哈哈。

回想自己點解會踏上行山這條不歸路，應該是由夜登鳳凰山之遠眺機場之觀日不成功之四人也成行山團開始，其實由另一種角度去睇香港，會發現原來她好靚。及後幾次行山活動都輕易被召喚，因為向高山舉目有我愛的天空而且好近，向遠處眺望有我百看也不厭的海岸線，唔去旅行都可以relax 到。非常好。哈！

工作後d 時間好似加左對翼咁，平平淡淡返工放工食飯訓覺返教會咁又大半年，覺得應該要俾d挑戰自己走出 comfort zone 咁巧合又被問玩唔玩毅行者，把心一橫就話要突破自己試下。結果就踏上這條甚具挑戰既不歸路。開心愉快亦感恩的是這條路上結識了不少好同行伙伴。

毅行者比賽當日

麥徑第1-4段 (47公里)
開始前好緊張，準備咁耐就到打大佬既時間。起行後，慢慢行保持住尾十名既速度，無比賽概念地繼續慢步向前，一來想留力，二來怕會抽筋。第一段有law 少陪行至東壩，最記得佢提醒我地support 位唔好停太耐，可惜，我們非常任性基本上每個support 位都停40分鐘以上hahaha 結果就是嚴重behind schedule 到達基維爾營CP4 時已比原定時間慢左6小時(心諗48小時內完成到已經好感恩，而我就完全高估左自己通第2晚頂既能力)第3-4段又有可誼朋友俊爺陪行幫手揹野減磅。感激呀！呢個時候大家都有傷有痛仍繼續行。

麥徑第5-6段 (15.2公里)
呢段是輕鬆的，但眼見時間落差咁大，有點驚完成唔到而有點焦急，亦見隊友身體狀況不太理想，又急又擔心好難形容。(別害怕祂知您難受擔當軟弱與困憂)另一邊廂，十卜添又是一個問題，感恩既是有最強十卜兼第5位隊友兼總指揮law 少賠上與女友慶祝紀念日既機會來呆等加指揮，安排我2位同事逆行第6段來會合我們送上水動樂加揹袋，減磅。仲有仲有第5段有名魔鬼教練Bernard的朋友鏘少出現chur 我地行，其實佢是用跑的。

麥徑第7-10段 (37.8公里) 重點來啦
城水燒烤場食飽抖夠，吹完水後。終於開始行尾段，7-8段針草帽，呢段練得最多所以行得最有慨念，雖然其實腳底有點痛，但慢慢地靠著那加給我的力量又真是愈走愈快，見人就過，同可誼一齊爆上山落山再上山再落山，其實好爽，停低抖左陣又聽到隊友把聲，更爽。到水站加水時個腦開始不能繼續正常思考，連工作人員都話感受到，笑左。又繼續唔帶腦上路，一直到大帽山落斜果段極度大風又凍，此段是練咁多次大帽山中最大風最凍既一次，好難頂….唉~難頂都要頂! 這就是毅行….呢句心裡無限loop。好記得呢段是孤身走我路的節奏，黑嗎嗎淨是見到條白色車線，然後d樹聲，昆蟲聲呀放大左100倍，突然又聽到有鼻寒聲(應該有人攤響路邊訓左而黑得濟我乜都睇唔到而又好驚踩到佢)，呢幾句詩歌真是好應景lol：當您走到無力繼續下去，當您感到寂寞困惱空虛，只要相信神隨時扶助您……就是咁眼訓住碌落大帽山。

%e6%af%85%e8%a1%8c%e8%80%85%e5%be%8c%e8%a8%98-%e5%af%ab%e7%b5%a6%e8%87%aa%e5%b7%b1%e7%9a%84%e6%88%b0%e6%9b%b82 落到扶輪CP8 已經即時坐低，好想訓覺。呢個位既十卜添非常極之好，有好好味既香芋西米露糖水食不特此仲有熱飯拎走路上食，最正正子既係所有袋+行山鞋(換左跑鞋)都擺左上車，基本上我地係淨拎支水動樂，無負重咁走9,10段。開始行第9段時已經是第2晚的凌晨時分，真是極度眼訓就如walking dead 般，個腦已經無能力控制對腳行咩方向只可控制對腳繼續行動。就響我地行到左搖右擺既情況下，兩位少字輩既長輩暨第5，6位隊友變身人肉帶路兼推進機lol。而我已經recall 唔到當時我係眼訓到一種咩既感覺，淨係記得我頂唔順訓左響地度然後俾我最討厭既不知名昆蟲經過我塊臉一次，由得佢，第二次，媽呀…我唔訓啦～起返身行都打左幾個冷震。之後我就明白了：保護你的是耶和華，耶和華在你右邊蔭庇你。白日太陽必不傷你，夜間月亮必不害你。呢種保護方式就證明左袮既真實，真好清楚我。個人醒醒地就繼續行屍走肉，去到水塘邊果段，少字輩隊友採取追尾燈政策，要我跟貼前面既可誼同時又十多次響我後面步步迫近，結果怒跑左好多次，總算追得上前面棧尾燈。