[台北山徑] 5條捷運可達的步道

如果話去日本係返鄉下，咁去台灣就可以話係返外家。不過，去到台北，除咗去夜市、上101、九份十份，仲有咩地方好去？來來來，就去行山啦。

顧及大多數香港人，出國旅遊鍾意黐實地鐵。而台北行山徑有一樣好，就係好多都可以坐捷運直達。而且呢5條行山徑，全程都唔過3個鐘，行完山仲有大把時間去大家最鍾意嘅夜市、西門町或者誠品!

1. 象山站: 象山親山步道

位於信義區，熱門程度不亞於香港嘅扯旗山（太平山）。因為，由步道入口行15分鐘，就可以飽覽台北101大樓，以及周圍嘅鬧市風光。既易行又有靚風景，難怪被台北市政府選為NO.1步道。

距離: 全線約2.3公里
難度: 1星 (5星最難)
海拔: 183公尺
需時: 約1小時40分鐘
交通: 捷運象山站下車，往信義路五段中強公園方向步行，約10分鐘抵150巷22弄登山口，或; 捷運永春站下車，往松山路永春高中方向步行，約25分鐘抵永春崗公園。

 

2. 後山埤站: 虎山親山步道

位於信義區。講難易度，可以話係1星之1星，因為只要用5分鐘就可以上到虎山峰。雖然係咁，不過步道會穿過河流，可觀賞罕有嘅樹蛙，晚間亦有機會睇到螢火蟲。

距離: 全線約3.9公里
難度: 1星 (5星最難)
海拔: 140公尺
需時: 約2小時30分
交通: 捷運後山埤站，循中坡南路往福德街方向步行，約20分鐘可抵福德街251巷慈惠堂登山口

3. 景美站: 仙跡岩親山步道

位於景美地區，被台北市政府選為TOP 5行山徑，皆因步道兩傍長滿大樹，夏天都唔怕熱。而且鳥類昆蟲種類煩多，同台北市區可以話兩個世界。

距離: 全線約3.5公里
難度: 1星 (5星最難)
海拔: 141公尺
需時: 約2小時
交通: 捷運景美站下車，往景興路方向步行抵入口牌樓。

4. 昆陽站: 麗山橋口親山步道

位於南港公園，係一條有百年歷史嘅古道。步道中，有一間歷史悠久嘅古宅「永安居」。而古道之中仍不少農戶耕地，可體會台北的鄉郊生活。

距離: 全線約4.1公里
難度: 1星 (5星最難)
海拔: 195公尺
需時: 約2小時
交通: 捷運昆陽站下車，步行經昆陽街至成福路211巷底北興宮登山口

5. 新北投站：中正山親山步道
可以話係台北市嘅飛鵝山，登上六百幾公尺嘅山峰，可飽覽整個台北盆地景緻。而這條步道以竹林為賣點，生態豐富，更是蝴蝶棲息地。

距離：全線約7公里
難度：2星 (5星最難)
海拔：646公尺
需時：約2小時
交通：捷運新北投站下車，下車後循泉源路步行經挹翠橋至郵政訓練所，進入往法雨寺步道，循指標至登山口。

咩係「親山步道」?

類似香港嘅郊遊徑，有晒明顯出入口，沿路有充足指示牌及景點介紹。其中最特別，步道會有「打印台」，畀遊客打個chok留念。

資料來源: Hiking Taipei

Fitz連結: https://fitz.hk/?p=108431

更多:
Fitz Facebook 專頁
[香港奇石] 草山 交叉石
[90後本土遊] 官坑脊 彌天棧道 象額象門 馬鞍山
Fitz Hiking 行山