[香港馬拉松史] 馬拉松的目標第三屆香港馬拉松(1980)

由

2018-12-21

Fitz > 運動 Sports > 跑步 Running > [香港馬拉松史] 馬拉松的目標第三屆香港馬拉松(1980)

(續上篇《[香港馬拉松史] 難忘的第一個馬拉松賽事 (1979年香港馬拉松)》)

眨眼又到翌年 (1980) 第三屆香港馬拉松。

日期: 1980年1月13日
地點: 石崗
路線: 除了在錦田有少少路段改道，整條賽道與上年相同

過去一年，亞霍的訓練形式亦大致相約。走下街，跑下樓梯，搵條斜路練跑，參加下啲賽事如半馬和元旦長跑等等。目標? 搔下頭，似乎就無喎? 不過，自問狀態? 肯定好過上年! 身形和體重? 好 fit 喎。今次買咗對$79嘅美洲獅靚跑鞋，經驗又有喎，事事俱備啦。嘻，快過上年，輕鬆跑完全程咁啦。

睇下參賽名單，共248人報名; 其中10個女子。你睇下，亞霍點都算是一個有經驗的馬拉松選手嘛，有馬拉松紀錄的跑手唔係好多咋; 而响3:30左右完成馬拉松嘅，嘻嘻，你自己數下喇……唔，多一個有目標嘞──唔輸俾女子啦!

頭圈，亞霍如猛虎出柙 (哈哈，着住對美洲獅嘛)，比上次更快嘅速度跟出 (fit呃嘛) 。第一圈10891m，用咗約42分完成 (當時亞霍無電子秒表呀，只係戴住隻普通分針表)。即平均唔駛4分鐘一公里。呀，要讚讚大會，今次水站有啲似檸檬味嘅水補給，無咁齋 (後尾至知是電解質水，你話亞霍當時幾無知呢; 另外，當時市面還未有寶x力之類嘅電解飲品同埋 gel 呀)。

第二個圈，响軍營跑道拿拿淋飲完水。好味，好味。呀! 唔記得睇表添，唔緊要啦，有力噃。

第三個圈的感覺好過上年。咦，不過，剛過第三圈，望望表，累計時間約2小時11分。咁計法：三圈共30886m，平均速每公里4:15。如僅計第二及第三圈，則段速已下降為4:27，真係疲喇! 跑馬拉松是用體力，係用腳，唔係用把口話感覺良好就得喎。

哎喲喲，女將伍麗珠又追咗上嚟! 唔通上年歷史要重演? 唔得，目標係唔輸俾女子喎，一定要快過佢! 去馬，跑快兩步。果然，真係可以跑快兩步! 明唔明? 只係兩步，第三步就要耍手擰頭 (我都想可以繼續舉腳) 投降! 此後，亞霍謹記以下兩件事:

跑馬拉松，30K後，人哋仲可以用跑緊嘅姿勢過亞霍，亞霍一定會耷低頭，睇唔起佢哋；相信自己，相信呢啲係幻覺。唔信？岳番高頭再望下，佢哋係咪响前面好遠囉，點會係剛剛過你啫，佢哋都攰咖嘛，點可以話過你就過你啫，係咪? (呢招駝鳥功，好難學咖。亞霍，好心你啦!)
亦自此，伍麗珠就是亞霍的偶像。偶像嘛，以後見到佢，都唔敢快過佢喇。做粉絲嘅，梗係要跟住偶像，以示尊敬啦。 (亞霍，你係快唔過人之嘛! 自量啦! 喂，唔好講咁白得唔得，要面嗰喎。)

呢個時候，一把似曾熟識，又親切，又關懷，又憐憫的聲音在耳邊柔柔的問道:「亞霍，你真係要諗下喎: 值唔值得咖? 咁辛苦? 搵啲咁無聊? 又嘥時間嘅嘢嚟玩?」

亞霍好感動，即時斬釘截鐵的回道:「唔值得! 唔再嚟玩嘞!」