Fitz > 運動 Sports > 跑步 Running > [山賽亦不是一個人] 港女從路跑到山賽的小故事

上回《[長跑從不是一個人] 港女1500m到全馬的小故事》講到1500m到全馬,個故事當然仲未完……

呢一年幾玩過形形式式嘅長跑賽事,亦達成左當日定下10K Sub-50 嘅目標。當你唔再單單係為左 Tiffany 頸鏈跑,而係想繼續喺運動路上尋求挑戰,個心就會蠢蠢欲動想要啲新嘗試。適逢幾個月前喺 Facebook 得知逆之女呢個女子專屬山賽,於是就即刻搵姊妹一齊報名參加25K嘅2人賽,希望初嘗一下跑山嘅滋味。

報得名就緊係要去操下,以往行山都係郊遊 mode,原來操山 mode 又係另一番風味,同平日跑運動場練 interval 操長課嘅感覺截然不同。平時跑步可能只需要注重自己 pacing 同心跳向前跑就可以,但跑山除左里數長之餘每一步落腳都係一個挑戰,一有不慎都會好易絆到或受傷,所以需要更高既耐力同專注力。

幾個月好快過,話咁快就到1月5號比賽日。以前玩過的女子賽例如台北半馬、名馬等都帶比我十分難忘的回憶。今次呢個女子專屬賽事亦絕無令人失望,無論賽前資訊、選手包、路線、CP補給、氣氛等等都係100分。

首先,逆之女嘅紀念品同 Facebook Post 都好有心思。而且起點有多個靚靚 Decor 同 Backdrop,更有化妝區幫各位女跑手扮靚,務求要你靚足全程。

化妝區,印水紙閃粉供女跑手使用
又係超靚既方向帶
點解連行李牌都咁有heart
成班女跑手起跑幾咁震撼

除此之外,路線指示清晰明確,每個分岔路口都有明確路標,有啲位置更有義工指示路線,確保參賽者唔會走錯方向。此外,是次25k組別的路線為逆走港島徑頭4段(大潭至山頂),起伏不大,難度相對低,絕對適合首次參與山賽的新手。沿途標距處更放有唔少鼓勵牌,行到攰望一望又會重新振作。

最令我感動係我地兩個人拖住手衝線嘅一刻,大會會讀出每個參賽者嘅名/隊名同完賽時間,仲有禮服男為我地送上完成獎牌,更會即場印埋完賽證書。

「恭喜哂跟住落黎衝線嘅係Team CACA,佢地嘅完賽時間係4小時10分鐘」

雖然時間唔算太快,但對第一次玩山賽嘅我地都算滿意了。

來源: Running Small Potato

當你以為完賽之後無野再讚逆之女就錯喇,原來大會仲安排左女士更衣室)比各位女跑手,一個安排咁充足同細心嘅賽事簡直係正到離哂地。

終點的女士更衣室

2019年首個賽事,亦係我第一次嘅 Team Race 同山賽,雖然今次只係行入門級路線,但當中亦好需要同隊友互相支持、配合同鼓勵。當你上斜以為自己要爆,隊友遞上一包 gel 一粒糖就會捱到落去;當你行到以為自己無力,隊友拍拍膊頭就會不自覺走到落去;當你離遠見到相機 (在此多謝每一個攝影師無私付出),兩個人就會即刻上電擺番靚 pose 笑住行落去。呢一切一切都係平日玩個人路跑賽事未能感受到。

Source: VL

「跑步19; 行山19; 跑山係double 19!」

身邊有朋友經常對跑步行山有以上嘅 comment,又或者其實喜歡跑步行山既你都會覺得自己成攞苦黎辛好19。

但我知道當操山練跑都有伴有隊友一齊練一齊衝,成件事就會變得不一樣,更會變得好熱血好有衝勁。即使賽事過程中如何辛苦,一路跑一跑呻話好_攰,下一次又會不自覺報名參加其他賽事。

We are Team CACA

多謝一直陪伴我嘅好隊友,亦多謝逆之女帶比我地呢個回憶。

明年再戰50K!

Fitz連結: https://fitz.hk/?p=111618

更多:
Fitz Facebook專頁
[逆の女] 當逆の女遇上忤逆男 CP1邂逅初戀味道
Fitz Running 跑步


文章為作者意見,不代表Fitz立場。