歐鎧淳 (右) 原定係6:15起步，佢男友胡子彤則7:45起步。
香港游泳選手歐鎧淳，星期日渣馬同男友參加10公里賽，仲齊齊衝線。衝線相片上到 Facebook 放閃。點知有眼利網民發現，歐鎧淳同佢男友並唔係同一組參賽。即係話，有人去錯組別起錯步。一日之內，大會取消歐鎧淳參賽資格。
比賽之後，大會網站有一份「於非指定時間起步之跑手名單」供公眾查閱。名單有晒參加者編號、姓名、組別、參加項目，最重要就係有「錯誤地於以下時間起跑」。邊個去錯組別起步，簡直係無所遁形。
我哋統計過，全馬、半馬，以及10公里各個組別，共有1,212位跑手被發現起步時間錯誤。依照比賽規例被取消資格，不會獲得完賽證書。
西隧口
1,200位起錯步嘅跑手，佔64,000位參加者2.3%，比例唔算多。不過如果專登提早或延遲起步，就會令某一組嘅比賽人數突然增加，直接啲講就係阻鬼住晒! 事實上，今屆比賽不斷收到跑友批評，話賽道比起往年更擠逼，特別係三號幹線「全馬 / 半馬」匯合處，以及出西隧上林士街天橋，有人甚至用「行花市」形容擠逼嘅情況。
半馬全馬匯合後同時經過水站
今次取消違規人士被資格，希望會收到阻嚇作用，各位都係乖乖準時起步啦。
Fitz連結: https://fitz.hk/?p=113924
Fitz Facebook專頁
香港運動比賽時間表
Fitz Running 跑步
張伯倫
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。