時局太混亂，香港人壓力爆燈，最適合就係做運動減壓。不過，為市民提供休憩場地嘅康樂文化事務處，喺市民最需要佢哋嘅時候，竟然連續幾日提早封場。市民唔可以去轄下場地踢波跑步游水，甚至連去圖書館睇書都唔得。
同情地諒解，港鐵提早收車，香港處於特殊情況，場地嘅員工都需要趕車搭，提早關門都算係無可厚非。不過令人奇怪嘅係，康文署呢幾日都係臨時臨急先宣佈提早封場，令市民大失預算。
六點半宣佈七點關門
早前有唔少讀者報料，話上網check過康文署網頁，唔見有閉館公告之後，就換好衫落運動場，但係去到先見到大門上鎖。佢哋隨即問: 封場點解唔同市民講?
上網一查，發現並唔係康文署無公告，只係佢哋嘅公告太突發，大家睇唔切啫。
----- 廣告 Ad -----
上面呢公告喺下午6點28分發出，內容係話康文署所有場地會於7點鐘關閉。大家約人食飯、約人開會，有事甩底都唔會得32分鐘去通知對方，所以康文署呢份公告真係好突發，亦好不近人情。
之但係，10月8日係周末長假期後第一個工作日，晨早已公佈港鐵夜晚8點收車，市面亦唔覺有突發嘅示威遊行，因乜解究康文署要突然閉館?
----- 廣告 Ad -----
1823: 無消息即係好消息
10月9日一早九點半，我哋依從公告嘅指示，打去1823熱線問下當日嘅場地開放嘅情況。等咗10分鐘，終於可以同1823專員傾偈: (我=我; 專=專員)
我: 請問今日康文署場地嘅開放時間?
專: 有無話邊一區，邊個場地?
我: 我想知全港嘅開放情況。
專: 咁要等等…….
(五分鐘)
專: 你記低先…… 馬鞍山運動場今日有活動，如期舉行，開放時間係………
我: 唔好意思，你係咪想逐個逐個場講我知?
專: 係呀!
我: 我只係想知全港嘅情況，康文署場地今日會唔會提早收?
專: 咁你再等一等……
(五分鐘)
專: 暫時我哋未收到有通知。所以會答你: 場館係依番正常時間關閉。
我: 但係噚日佢好遲先公佈喎……
專: 咁未有公佈嘅話，我哋只能當係正式開放時間。
我: 不過我要計劃今晚嘅活動……
專: 我諗你可以試下打去相關場地，直接問佢哋啦!
熱線電話係解決唔到問題，咁呢條熱線仲有咩用?
場地主館: 我哋最遲先知道
我係一個良好市民，所以依從1823指示，打咗去九龍某運動場。呢次好順利，唔使等，一打就通。接電話嘅仁兄，我無問佢職級，姑且叫佢做場地負責人。 (我=我; 場=場地負責人)
- 場: 早晨呀! (好有禮貌)
- 我: 早晨呀，請問今日你哋個場會唔早收? 我驚好似噚日咁嚟到發現關咗門!
- 場: (帶點無奈) 唉，我哋真係唔好意思呀! 今日幾點收，我哋仲未收到通知……
- 我: 咁樣……
- 場: (一輪咀唔畀我講) 希望你明白啦，場地幾點關門唔係我哋嘅決定，呢個係上頭阿大Sir話事丫嘛。咁佢哋上面決定咗嘅事，就要傳一大輪先傳到我哋場面呢邊。即係話，我哋場面就係最遲嗰個知。
- 我: 我明白……
- 場: 好多謝你咁體諒呀…… 我哋收到消息都會第一時間公佈呀! 你都明白啦，好多人專登由好遠嚟呢到踢波，仲約埋十幾廿人，我哋都唔想市民嚟到摸門釘……
- 我: 我明呀……
- 場: 唉，不過呢兩日，我哋都係四點呀、六點呀，好遲先收到通知，所以呢幾晚我哋都知好多人換好晒衫，嚟到先發現無開門，我哋都唔好意思呀!
- 我: 即係話今日未收到通知?
- 場: 係呀，仲未收到……
- 我: 咁唔該晒你呀!
- 場: 我都好多謝你，咁體諒我哋。聽到你呢個電話，知道有市民明白我哋，我哋都好開心……
----- 廣告 Ad -----
政府失職 市民埋單
負責場地嘅仁兄多番向我道歉，都明白佢已成為磨心，亦令人同情佢哋嘅處境。大家有怪莫怪，要怪都係怪康文署署嘅訊息太遲發佈!
事實上，當今政局嘅亂象，政府難辭其咎。香港人加油!
Fitz連結: https://fitz.hk/?p=126334
