大嶼山，香港最大嘅島嶼，面積接近香港島嘅兩倍。您可能成日都去——去機場、去outlet、去昂坪360、去迪士尼、去行鳳凰山。但你有冇諗過—有一日唔係「去」大嶼山，而係，用身體，游佢一 round？首先來個簡單自我介紹。我係一名耐力運動員，過去二十年，嘗試過唔少嘅耐力挑戰——6/7大馬拉松、Full Ironman、Oceanman、UTMB CCC、Spartan、HYROX；而喺 2023 年，我亦同三位隊友成功完成英倫海峽嘅橫渡 (相關文章)。
踏入年尾最後幾日，我想趁記憶仍然清晰，好好將今年最難忘嘅一段旅程記錄落嚟—環大嶼山 70 公里游泳挑戰。同時，我亦希望將呢次環大嶼山嘅經歷，跟我喺兩年前完成英倫海峽接力橫渡作個反思。兩個挑戰究竟靠乜嘢撐住繼續向前？希望睇完，你會明白。
P.S. 本文純屬係我個人回顧與反思，而並不代表主辦單位。
賽前大合照
挑戰背景
2025 年 11 月 7 日，我同一班隊友喺香港迪士尼碼頭下水，參與【聖若瑟書院 150 週年】環大嶼山 70 公里游泳挑戰。
呢個唔係一場傳統意義上嘅比賽，而係一項喺香港前所未有嘅耐力游海挑戰。我哋以接力形式，完整環繞大嶼山一圈游泳。據我所知，大會籌備咗超過一年，期間需要向多個相關部門申請同取得批核，先至可以成事。用雙腳橫跨大嶼山我就試過唔少次——包括 100 公里嘅 TransLantau。但「游水環大嶼山」？70 公里？唔係啩？
所以由第一刻開始，我已經好清楚，呢個挑戰絕對唔係講笑，更加唔可以掉以輕心。航線橫跨多段外海水域，潮流變化快而複雜，任何一刻稍有鬆懈，都有可能帶來風險。
喺咁嘅環境之下，耐性同隊友之間嘅信任變得極之重要。要成功完成呢一圈，唔單止靠體能，更需要周詳嘅準備同充分嘅訓練。Let the training begin!
練好膽色
今次環大嶼山挑戰，一共有三支隊伍參與，分別來自聖若瑟書院、香港律師會，以及我哋代表喇沙書院舊生會。我哋呢支喇沙隊，成員來自唔同畢業年份，當中有唔少游水界嘅精英及紀錄保持者 (除我之外), 不過大家都享住相同嘅價值觀、彼此信任，同一份深厚嘅師兄弟情誼。成員包括：
Michael Wan — 隊長
Leo Chan
Anthony Lo
Chun Yin Lui
Arthur Cheung
Hoi Hang Lau
Michael Ng （物理治療師及支援泳手）
喇沙隊
準備過程之中，我正喺新加坡工作，冇游長途兩年，我第一個聯絡嘅就係相識十多年嘅三鐵老友 Chwee Ann，協助安排同我來多次長距離公開水域訓練，主要喺星洲Sentosa 同 East Coast 一帶進行。新加坡水溫偏高，陸上氣溫經常超過 30°C，補水同電解質管理，亦成為每一次訓練不可或缺嘅一環。
星洲海訓練
回港後，我亦同喇沙隊友專登夜晚晚走去淺水灣進行「黑海」訓練。佢哋游水游得多不過黑夜操水可能真係第一次。淺水灣防鯊網內不停來來回回，刻意磨練我哋面對摸黑游水嘅意志同克服任何潛在嘅恐懼。
淺水灣黑海訓練
正式比賽前半個月，我哋更參加咗兩次大會安排嘅海上訓練：一次由坪洲游往大嶼山迪士尼，另一次實際體驗部分比賽路段。訓練當日，竟然有兩條極為罕見嘅中華白海豚喺海中出現，喺我哋身邊游過—就好似為呢次環大嶼山挑戰打聲 hello!
我哋可以做嘅準備已做到足。We do our best, God does the rest.
下水的一天
比賽當日，我一早起身準備裝備、營養補給同暈浪藥，之後前往迪士尼酒店碼頭集合。到達後見到唔少校友同支持者到場打氣，迎接呢場將會橫跨整個夜晚嘅挑戰。大家不斷影相、互相 high five，氣氛高漲，所有人都充滿期待同興奮！
星級帶領當然興奮
我哋登上嘅係一艘體型幾大、亦非常新穎嘅遊艇，一共有三層，船上甚至設有兩個可以沖熱水嘅淋浴間實在太正！而最醒目嘅，當然係船頂高高飄揚、清晰可見嘅兩支喇沙大旗。
喇沙隊護航船 (多謝 Ricky Lai 靚相 ）
下午 4 點正，挑戰正式開始。Anthony 擔任我哋全隊第一棒，因為佢高大威猛又夠快；一開波就算幾大浪嘅海況下，佢首棒 40 分鐘竟然游咗近 3 公里，實在厲害。隨住第二、第三棒都好順利，我哋中途亦游過唔少大嶼山地標，包括青馬大橋下方穿過，場面相當壯觀。
----- 廣告 Ad -----
游過青馬
我的第一棒
終於輪到我要落水 (第六棒) 當時係晚上 7 點左右。太陽已經落山所以天已全黑。我刻意冇食太多，避免喺惡劣海況下出現腸胃不適；但仍然補充咗一包 Maurten gel—同我跑馬拉松前一樣，確保身體有即時可用嘅能量。水溫幾多度我唔知，但已經唔會諗咁多，一跳落去就即刻狂衝。
因為有啲航段水位較淺，我哋嘅遊艇唔可以太貼近泳手，我只能一路跟住一艘獨木舟游。獨木舟上面包圍好類似聖誕LED 燈, 特別係晚上容易畀我哋睇到。獨木舟手亦係我哋嘅導航員，同時亦可確保我哋嘅安全。我呢一棒游咗 2,138 米，平均配速每 100米2分02秒，對我來講不過不失。
返到船上，隊友恭喜，心情興奮。我沖咗個熱水涼後開始食嘢，船上準備咗好多食物——意粉、壽司、焗飯應有盡有，仲有朱古力、薯片同杯麵，簡直好似喺船上開 P。
開心之際，突然透過 walkie-talkie 聽到負責安全導航船不停響起警告：前方海域有漁網，大家泳手一定要小心。我從未試過喺游泳時遇上漁網，不過我好清楚，呢種風險絕對唔輕。之後隊長 Michael 同我哋講，佢本人啱啱游完亦曾短暫被漁網纏到，幸好可以迅速安全咁脫身！嗰一刻，我第一次真正意識到—夜泳最危險嘅地方，往往就係你睇唔到嘅嘢。黑暗唔會預警，只係靜靜存在，逼你時刻保持百分百警覺。
美女與野獸
晚上 11 點幾，我哋游經香港機場一帶，不時聽到飛機起飛嘅聲音。接住，我喺游近港珠澳大橋一帶，眼前嘅景象真係靚到難以形容。我坐過巴士行呢條橋來回澳門好多次，但從來冇諗過，有一日會喺黑夜之中，我竟然喺橋底游水。真係講都冇人信。
夜游港珠澳
呢一段海面相對平靜，偶爾聽到同感覺到有魚(或其他水中動物）躍出水面。隊友仲話試過有條細魚跳入佢口裏添真係夠曬難忘！呢一 leg 應該係我哋最享受嘅一段，我嗰 40 分鐘游咗 2,150 米，平均配速 1 分 55 秒。
到凌晨 3:24，我哋正式踏入「野獸」部分—全程最危險嘅一段叫「分流」。呢一段我哋一早已經知道會係最困難、亦最具風險。船一駛近，海況突然變得極之混亂，船身左搖右擺，枱上嘅食物同飲品幾乎滑落。即使事前食咗暈浪藥，仍然有隊友頂唔順想作嘔。
水入面嘅情況更加唔容易。到我落水時，潮流交錯，浪高三至四呎根本看不見前方，我哋同隊甚至有兩艘獨木舟被掀翻。我只能盡量保持冷靜，一划一划慢慢向前游。根據國際渡海規定，我哋係唔可以用任何輔助工具包括安全浮波，應該都係游水咁多年嚟最驚心動魄嘅一次。
最意想不到嘅係，我呢棒反而係全晚游得最快嘅一段。超大浪唔覺唔覺推住我哋向前，最後竟游咗 2,400 米，平均配速 1 分 31 秒！返到船上，個個攰到唔似人形，有人直接伏喺船邊嘔。我哋就好似剛剛打完場仗嘅士兵咁。我冇吹水冇食嘢，沖個涼後直接走上船頂大覺瞓—全身體力已透支120%，唔再休息肯定唔可以繼續！
醒後的曙光
我喺上層甲板瞓得好舒服，加上海風，深睡近兩個鐘，直到隊友叫醒我話差唔多輪到我再次要落水。擘開雙眼，見到一道日出正喺海平線升起—嗰一刻，我知道最艱難嘅時段終於過去。
海面仍然有大浪，但有咗陽光，一切好似變得可控。我影低日出嘅相，po 上 Facebook，標題係：「原來有太陽嘅湧浪，點都好過黑夜冇太陽嘅湧浪。」
帶出希望的日出
之後我哋再游多咗幾棒。雖然浪依然好大，但心理上已經冇咁繃緊。途中游經前往澳門嘅航道，不時有噴射船同高速船經過，船浪又急又猛，我哋必須格外小心。
與迪士尼再相遇
最終，我哋以 18 小時 39 分鐘，完成一共28棒嘅接力 (三鐵運動員兼教練嘅 Arthur 係我哋最後一棒英姿上碼頭）。我哋比原先預計嘅 22 小時快得多，所有隊伍亦順利完成呢次重大挑戰值得慶祝！上到岸，當然大家擁抱慶祝開香檳。經過整日嘅游海，我哋終於得咗喇！
完賽後的喜悅
Strava 的見證
完成挑戰我要衷心感謝好多人。
首先，多謝隊長 Michael，因為你嘅邀請，我先有機會成為呢段旅程嘅一部分。亦要多謝每一位喇沙隊友——雖然我係最慢嗰個，但你哋一路大大聲為我打氣所以我點敢放棄。同樣要感謝所有慷慨捐款支持我哋喇沙書院舊生會隊伍嘅朋友，你哋嘅支持，唔單止係資源，更係我哋喺海上堅持落去嘅力量。
最後，最重要係感謝聖若瑟書院嘅邀請，以及所有幕後付出嘅工作人員：船員、獨木舟手、義工、救援隊伍，仲有各個相關政府部門。正因為你哋周密嘅籌備同專業安排，呢個前所未有嘅挑戰先可以安全、順利完成。
呢次唔只係一場游泳挑戰，而係一個由無數人一齊完成嘅集體成果。
後記｜大嶼山 vs 英倫海峽
完成今次挑戰後，有朋友問：「究竟邊一個難啲——環大嶼山，定係橫渡英倫海峽？」有趣嘅係，今次參與環大嶼山挑戰嘅泳手之中，包括我在內，一共有四位曾經喺唔同年份成功完成英倫海峽橫渡。我哋亦喺終點影咗一張 reunion 大合照，意義非凡。
英倫重聚
如果有睇過孫博士喺寫過關於我哋英倫海峽嘅文章「游過生命海」就會知道，當年我哋係喺全黑嘅情況下，凌晨 2 點喺英國 Dover 起泳，每人輪住游大約一個鐘。到第四棒時，其實天已經開始光。換言之，真正完全處於黑暗之中嘅時間，其實只有大約三個鐘。
大嶼山，係另一種「玩法」。我哋幾支隊伍幾乎喺黑暗之中挑戰咗接近 12 個鐘，再加上海況反覆、浪湧不定，無論喺體力定心理層面，都難頂得多。
另一個好大嘅分別，就係「陪伴感」。喺英倫海峽，渡航船幾乎全程喺我身邊，隨時可以見到船上隊友同我打氣，亦會舉牌提示時間同距離；但喺大嶼山，遊艇往往需要保持較遠距離，真正陪住你嘅，只有身邊嗰位獨木舟手。不過佢一路要專注劃艇前進，大家嘅互動自然少啲；冇指示牌提醒，有時唯有停低，大聲問一句：「仲要游幾耐呀？」
相對而言，大嶼山較有利嘅地方，係水溫。英倫海峽嘅水溫比香港低 8–9°C；相比之下，11 月初大嶼山嘅水溫，無論喺海中定上水時間，都冇想像中咁凍，令身體喺每次上水之後回復得快得多。
所以，究竟邊一個更難？我可以講兩者同樣艱鉅。不過，任何能夠嘗試其中一項嘅泳手，都必須喺身體、心理，同意志上，做好全面準備。正如嗰句好簡單、但好真實嘅話：“You get out what you put in.”
最後，喺度祝大家 2026 年身體健康，經常運動— 無論游定跑，都繼續勇敢追求您下一個夢想。
