兩次的TOR 330，成就一段奇妙的人生旅程，Gordon與極度虛脫和呼吸困難搏鬥，還遇上C君和陸永(不全是標題黨)
我整天在諗（窮L的日常），為什麼總有人有自唔在，攞苦嚟辛；有服唔舒，攞戰嚟挑？我問AI，他/她/祂 說限於晶片速度，目前仍有很多解不開的難題，特別是廣東話的語文結構。
唯有訪問一位攞戰嚟挑的實體人辦，在這年半時間，Gordon (劉錦輝) 2025年完成了298K的四徑 (完成者)，之後八百流沙（400K），再之後香港V162 (100 Miles)、再再之後雲南高黎貢 (100 Miles)，再再再之後印尼 Rinjani100 Miles (他說是最接近死亡的一戰)，這是會令跑友嘩三聲的resume。
巨人不是浪得虛名，憑Gordon的越野跑CV，可轉做外賣仔步兵，接晒所有送鳳頂針山四徑嘅單。
其實 Gordon 沒有接到上天什麼大order，卻常在山頭野嶺苦其心志，勞其筋骨，餓其體膚，空乏其身。但他絕不骨瘦如柴，Gordon是 182cm x 72kg 的巨人。於9月踏足意大利阿爾卑斯山，號稱世上最難超級越野賽的「巨人之旅」TOR 330（Tor des Géants ，330K，攀升29608M），在峻嶺和雪地走了109小時，期間虛脫、浮腫、刺痛、冰寒、渴睡、精神錯亂….等，紛紛到訪，絕對是攞命嚟玩！
Gordon 說再玩 TOR 是想找出什麼是自己的局限因素，看看可否突破？(明，向太太申請批文，總需要一個美麗的包裝)
比賽有9位香港跑手參加，只有3位完成，Gordon是港一。中國選手趙家駒以 65小時55分破紀錄奪冠。趙說: 「這會是我最後一次跑超過168公里的組別，真的是最後一次，以後我不會再跑這種超長距離了，生不如死啊！」信佢一成，頭暈身㷫。
109小時的搏鬥，點解人要同自己咁過唔去？希望方東昇會探討一下
Gordon活著回來，約我在川龍飲茶，想不到三十多歲的後生仔竟然情陷耆英私竇，令我重遇失散多年的臘腸卷和鵪鶉蛋燒賣(吃光了才記得打咭)
前傳說起
我相信每一個時空發生的事情，總有個前傳。塵世間的所謂緣份，說穿了不過是一連串前傳造成今天的所謂「緣」。2026年9月13日 Gordon 出現於意大利 Courmayeur TOR 330 的起跑線，鏡頭 top shot拍攝拱門，畫面漸漸 out focus，換入2024年他首次玩 TOR 330 的前傳場景。
「2024年的 TOR 不停落雨，過左頭一日，超凍，感到呼吸困難，呼吸越嚟越淺，因為缺氧，好易攰。其實已經有羽絨，可能我氣管天生敏感。」
「會唔會係高山反應？」
「中間會上幾座2000至3000米的高山，其實唔算好高。但行一兩分鐘就喘晒氣，十秒八秒就要停一停。」
「到了第4個大站之前的CP，醫生話可能係 Bronchiolitis 細支氣管炎，俾左 Ventolin 同 inhaler 果類嘅嘢我，但仍然冇乜好轉。到了第四個大站，醫生說 SPO2 血含氧量太低，一定要剪帶。我記得咳出嚟嘅痰係黃色一粒粒形狀，唔係平時嘅樣。離開CP時回望，覺得好唏噓。」雖說拼盡無悔，但未圓嘅夢，總在心中留下一個洞。
離開遭剪帶的CP，回頭望，藍天、白雲、陽光都等著你回來。
2024年9月回港後，Gordon 感到個肺比以前弱了，但這位巨人沒有停下來，11月與教練KFC組隊完成毅行者。2025年1月更瘋狂，用了70小時跑畢298K的4徑，親吻了梅窩碼頭的郵筒。
10月又踏上八百流沙玩命之旅，「又係第二日出現一模一樣徵狀，呼吸困難，行10、8秒要停幾分鐘，就咁樣行了280K，之後俾醫生叮走。八百流沙只是2000-3000米的高山，相信不會是高山反應造成。」
八百流沙又同樣出事，在CP服用了不知名的XX散，再頂多一大段才肯剪帶。Gordon識好多嘢，就係唔識死
「有冇感覺同死亡好接近？」
「我冇諗太多，只想點樣可以返到終點，我鍾意解決問題，好目標為本。」
「經歷過上次 TOR，我有晒心理準備會出現同樣狀況。上次係70幾小時行左200K出事，今次又係70小時280K DNF，心諗有冇咁邪？但我個人唔信邪，我一定要 break 左呢個 limit。」
「返港後我去睇專科醫生，醫生唔肯定是否哮喘，可能係個肺天生比較弱。我覺得可能係氣候變化引發，身體適應唔嚟。」
Final Exam終極一戰
今年 Gordon 報 TOR 330，除了是復仇之外（越野跑界好像個個都心懷血海深仇要報），還有一層重要意義：「我要一個終極 verdict 話俾我聽，究竟我可唔可以做到咁長距離，我好想去番相同嘅環境，但要完賽。今年巨人之旅就係我嘅 final exam。」
Final exam 之前，Gordon安排了 mid term test，包括香港V162（3/26）、雲南高黎貢（3/26)，同埋攞你命3000嘅印尼Rinjani 100M（5/26），此賽完成率極低，他是港男一回終點 (僅慢全場女一的敏怡一小時)，但他用恐怖來形容，絕不建議參加，就算生無可戀都不要去。
印尼Rinjani 100M火山之旅，是Gordon最接近死神的一次，不建議玩x3
「我要透過這些 mid term 令我 clear 幾個重要嘅 control factor，包括高度、低氣溫等，當我身處同一境況時不會再出事，證明呢啲因素唔係我嘅天花板。」Gordon是個理性人，不是復仇上腦的衝動派。
「今次我有幾個重要嘅benchmark要過，第一係頭24小時，第二係在首100K內要上一座3300m的高山。如果過到呢兩個關口，我好有信心會走到返終點。」
「今次風和日麗，見到嘅景況同上次好唔同，打個3300m大佬時至知原來座山係咁壯麗，上次只見到一片白茫茫，似足Game of Thrones。」即刻有晒畫面。
2024年的3300m 大佬，白雪鎧鎧，前路茫茫
2026年同一山頭卻風和日麗，Gordon 說全歐暖化嚴重
「當我去番上次被剪帶嘅CP，我以為會觸景傷情。其實已經冇乜感覺，原來已經釋懷。」巨人就是能走出創傷，也無風雨也無晴地向前奔去。
出事位
「咁大壇嘢，點可以無出事位，你有做過乜嘢錯事冇？」為了滿足讀者，我一定要問。
「聽講果度好出名按摩，開賽前我去試下，隔離個日本仔話佢哋會幫埋包腳，防止出水泡，手勢好好，完賽都唔會甩。個師傅問我想包邊度，我話呢度果度呢度果都會起水泡。」即係全包，都話貪是萬惡之源。
「當過左上次quit嘅CP之後，開始感到腳掌好痛，跟住要大上大落千幾米，上OK，落坡時開始嚟料，每一步都痛到爆，我玩四徑時都未試過咁痛，以為自己渣左。後來開始諗會唔會係隻腳包得太實腫左？而且我天生左腳大過右腳，隻鞋會更加逼。但個包腳師傅包得太實，我點搣都搣唔甩。」
「去到check point終於剪甩左，但隻腳已經腫脹，行每步都由骨痛出嚟，最後百多K我用阿婆行路嘅速度完成。其實呢啲咁低級錯誤係唔應該犯，但我好鍾意試新嘢，所以成日都瀨嘢。老婆話我乜嘢都想試，結果食埋啲唔好食嘅嘢。」有個好奇心重嘅老公，係值得老婆擔心。
「第二日瞓醒起身，仲有爆開嘅感覺，要頂住呢種痛幾分鐘至起到床。原本諗住完賽後去幾個地方旅遊，結果係張床度住到走為止。」巨人的擱淺。
Gordon辛苦奮進時拍的，見圖中兩座巨石 (箭咀)，像兩位智者在對話。可能是什麼人就見到什麼風景 (我在諗草都冇條，附近一定冇7仔)
「賽前你有冇定目標時間？」
「我計劃左3個plan，normal plan（normal plan中又分plan 1是100、plan 2是110、plan 3是120小時）、aggressive plan (95小時）同瀨嘢plan。今次開賽前我身體狀況良好，想用aggressive plan，但隻腳出事，最後都可以用normal plan2完成（109小時）。就算萬一要轉用瀨嘢plan，我都會堅持一定要完賽。」這三plan策略有參考價值，可用於考試、求愛、問friend借錢…等。
「原先我跟 aggressive plan 訂賽後嘅酒店，預先 send 左行李過去。但我遲左十幾個鐘未到，所以比賽期間成日收到酒店call問，喂阿生，你幾時嚟 check in？我話而家係山上面衝緊（用阿婆行路速度）。佢話明白，咁你加油。」好明顯 Gordon 訂酒店冇出個瀨嘢 plan。
農夫與Dodo姐上身
聽很多超級越野賽跑手說，晚上睡意漸濃時很大機會出現幻覺，看見不同的動物和人物，十分逼真。但 Gordon 這次沒有見到獅子老虎，卻有很奇異的經歷。
「我以前玩富士山、四徑等都有幻覺，乜動物都見過，不過我知係幻覺。呢次我冇出現幻覺，但有段時間我化身為農夫中嘅C君，在腦海中同陸永、Dodo姐對話，就好似係電視節目中嘅對話，好真實。」
Do姐話要去富良野試蜜瓜，陸永即說：「我唔食涼嘢㗎！」Do姐：「一定要體罰佢！」C君/Gordon問：「你體罰唔係諗住錫佢吖嘛？」 (AI生成圖片)
「我唔知點解我咁高會係C君，而唔係陸永，我完全係用C君果啲少少輕浮少少串嘅語調同Dodo姐陸永傾偈，天南地北乜都講，好into，去到最後的一個CP時突然停了，返回到現實世界。但我絕對唔係農夫粉。」其實你唔怕認，又唔係話你係 Black Pink、Lolly Talk粉。
擁有負天賦的Gordon
「你點樣入越野跑個坑？」
「以前讀大學住宿舍跟 room mate 玩跑步、做gym操肌，我曾經玩到隻手掂唔到背脊，我唔係咁鍾意肌肉男嘅款 (應該係唔想要揩埋堵牆至掂到背脊)。出嚟做嘢轉去玩三鐵，好辛苦。2014年跟friend 去玩人生第一個山賽 Sea to Summit 30k，覺得幾好玩，從此愛上跑山。」
巨人Gordon 三鐵Ironman 70.3，表面好英，背後要克服的事情太多
「不過起初跑步死嚟，我試過跑到膝頭哥滲血，應該係磨損左裡面嘅血管，超痛。仲有我弱弱嘅肺和嚴重鼻敏感，呢啲都係我嘅負天賦。不過我冇嘢叻，我最叻係捱，捱苦捱痛我OK。」雖然上天出錯貨，送了負天賦給 Gordon，反而練成他骨格精奇，比別人強，成就了 Gordon 的小宇宙。
破解人生的荒謬
「 我好鍾意睇卡繆 (Albert Camus) 寫嘅《西西弗斯神話》，講荒謬哲學，西西弗斯因觸怒眾神而被罰，將巨石推上山頂，跟住石頭又碌番落山腳，要永無止境咁推大石上山，成件事好荒謬。我地每日返工放工，營營役役，重覆又重覆咁生活，同樣咁荒謬。要將呢件事變得幸福，你要自己俾意義。」
其實睇少啲卡繆呢類食飽飯亂諗嘢嘅人，人生會唔會冇咁荒謬？
對，「一念天堂，一念地獄」(地藏經)，意義係自己賦與的，自己是生命的主人，成件事就沒有那麼荒謬了。
「呢句說話令我諗起跑四徑，一般人都會認為港島徑最易食，但對於我係最大挑戰，當我係盧吉道好頹咁砌緊，接到教練電話，說去梅窩班船廿分鐘後到，錯過左就要等好耐，我知仲有好多supporter等緊我到。由凌霄閣跑落碼頭約4K多，我用左20分鐘跑到碼頭，四徑尾段仲開到4分披。因為呢段路對我有好唔同嘅意義。」
Gordon 對超乜超物嘅長途山賽都賦與幾不同的意義：「我最重要目標唔係要上台，唔係要造時間，係要解決期間遇到嘅問題。每次落場我都有信心完成到，如果唔係受傷，無論個山幾高，條路幾漫長，你用阿婆速度一定完成到。我享受嘅係過程中要解決大大小小、預計唔到嘅難題。」
MDS撒哈拉沙漠超級馬拉松(2024)可以滿足 Gordon 解難的特殊嗜好，包括成10日冇涼沖
Gordon，如果要解決問題，其實你不用遠走到歐洲爬上3千幾米嘅雪山，你屋企要換窗簾、洗冷氣機、馬桶漏水、電視機 remote 唔見左、貓星人失戀…..大把問題過你解決，你解決左未？
彩蛋 – 批文是怎樣取得的？
去世界各地征戰大大小小的賽事，Gordon 除了要克服上天給他的負天賦，還要過最重要一關，就是取得太太的批文。外出比賽又話要早少少去適應，完了又話要復康跑一、兩日。每次返嚟就一條死魚攤係度，旁邊是兩堆爛臭衫和佈滿泥濘嘅跑鞋。老婆的批文冇出 year pass，要逐次申請。批文是怎樣取得?
「我會盡量 involve 太太，例如我跑 UTMB 時太太做 support ，玩四徑時佢負責揸車，石澳段條馬路好窄，我仲同佢一齊去試路。大賽見到太太同家人在終點等待接放學，好觸動人心，事後大家都好回味呢啲片段。」幸福其實好簡單，但有少少貴 (成家人機票喎)。
「不過有些賽事over 48小時，太太去果度冇乜好做，我唔會帶佢去。」獨留太太在家中，她一定會問：「咁你有乜嘢俾番我先？」
「give and take，我唯有出血囉！」劉太，我現場見到 Gordon 的笑容是甜蜜的！
此刻，起碼值一個Gucci 和一次Club Med北海道滑雪度假村
