[Translantau 100] 義工的使命

早兩天舉行了一個越野山賽 Translantau 100，呢個山山賽係賽季中最後一個長途賽事，亦是 100km 大滿貫中最後一場。去年賽季自己因為要為北極馬拉松備戰，一口氣報了這 4場100km 賽，最後順利完成並取得呢個殊榮，真的好感動。今個賽季原先未有銳意再做大滿貫，但又幸運地其中兩場要抽籤嘅 100km 又在因緣際遇下玩得倒，所以都覺得唔應該浪費左呢個機會；加上去年呢個賽事雖然完成，表現卻相當欠佳；所以今年都有打算再接再勵再參加，力求有所改善，做個好一點嘅時間。

好可惜，因為同朋友嘅溝通問題，最終都未能成功報名。然而朋友提醒我大會當時仍在招募義工中；諗深一層，逢有賽事自己都係參賽嘅一份子，做倒義工嘅機會其實遠比參賽機會更加罕貴； 而早前參加過 Ultra Trail Hong Kong 嘅比賽，大會在嚴重缺乏人手下仍然強行繼續開賽，結果令到選手苦不堪言，所以更加體會到義工在賽事中嘅重要性。由於自己亦有好多朋友都有報名參加呢個比賽，所以最後都決定去幫手，順道可以替參賽嘅朋友打下氣。

我同朋友刻意選擇左大會較難搵倒義工嘅時間，亦即係凌晨通宵時段；大會安排左我地響距離起步 25km 左右嘅深屈道路口駐守並為跑手指示方向。自己素來都有攝影嘅興趣，今次亦順道拎埋相機為跑手拍照留念。我同朋友除左指示方向免得跑手走錯路外，縱然只得我地兩個人也好 （亦都慶幸因為遠離住宅區）每當從遠處見倒跑手跑緊落嚟，我地都盡力地歡呼、拍手及不停揮動閃棒；當佢地經過我地身邊時，我地都雀躍地講一些鼓勵說話，「師兄，頂住呀！你得㗎！」「最高最難嗰個山已經過左㗎啦！好犀利呀！」其實我地駐守嘅位置離起點唔算太遠，參賽者還不至於很筋疲力竭，然而當時已經係深宵時份，加上天氣寒冷兼剛跑過一段相當艱辛嘅路段 （鳳凰山），佢地難免都開始會有倦意及疲態；我地都希望藉住呢一點嘅熱鬧，可以令佢地重新提起精神；加上參賽者見倒有人替佢地拍照，又會立即擺點姿勢及微笑，這樣又可以令佢地可以稍為抖擻抖擻一下。其實好多選手見倒我地捱更抵夜地為佢地加油，都紛紛向我地表示謝意；猶記得自己參與HK100 時，見倒小義工夜深時份仍落力幫參賽者打氣，自己頓時都多左一份拚勁，提醒自己唔好令到佢地失望要堅持行埋落去；今次自己都希望能夠做倒呢個角色，可以比倒參賽者多一份推動力，捱過艱苦位置，努力地繼續完成賽事。

義工嘅幫助，直接或間接地影響參賽者嘅表現及發揮；今次機緣巧合下可以一嘗做義工嘅滋味，真的很難得。其實要順利地舉辦及運作一場賽事，確是需要好多嘅人力資源；所以好希望大家也多一點參與義工呢個角色，一起協力打造既安全又熱鬧嘅賽事，參賽者能玩得投入之餘，義工也能從中學習有所得著，甚至在互動下開始對運動產生興趣，一起投入這個大家庭也不定呢！

(編按：文中圖片全為作者所攝。)

更多：
Fitz.hk Facebook專頁
休息是為了跑更遠的路
HK100，有感而發
張思縈@Fitz.hk
Fitz Hiking 行山