[家有兩拳王] 黑暗的8年

好多人成日讚我好fit，唔似係兩個小朋友嘅媽咪，等我今日同大家分享吓我都有黑暗嘅8年！

其實我喺青春期中三至讀完書呢8年，我曾是一個要著Giordano加大碼衫的大肥婆，為咗唔畀人笑用過好多方法去減肥，最初每朝返學前去跑足球場，可惜因姿勢不良換來一對甲組腳。仲長期以絕食饑饉、食朱古力瀉藥、食草渡日(無油無鹽嘅菜)、4日蘋果餐、用晒D Grant Loan去纖體中心綁濕繃帶、食營養師度設計餐單等，結果通通都唔work，一食返嘢體重就大反彈，個人憔悴又抑鬱得很，而且令身體皮膚都差透。

之後就走去游水，每日都逼自己去泳池用自由掙扎式來游10個塘，配合埋練仙餐單，日復日之下，結果體重真係減到得返98磅，但睇落一D都唔Fit，又殘又巢皮，我阿媽仲以為我患咗怪病，成日叫我去睇吓醫生。因為當時嘅我瘦到好似皮包骨咁，D皮又鬆弛又冇彈性，每個人第一眼見到我，都唔會將好瘦好靚聯想埋一齊，只會覺得我有病，病入膏肓就快枯死咁款！

後來我聽見有人說打拳一個月可以瘦3吋腰，我即刻飛撲去日日打，點知打左一個月練左少少肌肉出來，體重重番D到102磅，「重左？！」講真當時重左果DD真的十分非常極之唔開心，但見D肉緊緻番D，睇落有番線條成身均稱咗，應瘦嘅地方Firm咗，成個人望落精神左，而且感覺副偈有番動力。之後Keep住練，人慢慢又重番D但明顯脂肪層係薄左嘅。

我懷住第一胎的時候，我個身型又變返成個波咁，心情非常不甘，暗自許下諾言要生完仔之後極速修身，結果坐完月後我只係用咗短短3個月便已經Fit過生仔前，感覺產後修身沒有太大難度。接著好快就懷了第二胎，我又再極速變回肥師奶，全身未練得太結實的肌肉隨著荷爾蒙改變又再被拆散晒，之後又重複由頭來過修身，話說回來我都算很有經驗呢^^”

大部份的我們都不是職業運動員，要擁有像運動員的肌脂比例當然無敵，但我個人覺得對身體長期要求太完美總是有點吃力的，吃力不在鍛練過程，吃力在於放棄太多與家人朋友共聚享饍的樂趣，所以我都是比較適合肥肥地好D(自我安慰中)！

榮拳館 WUnique & Bomber Gym facebook專頁

更多：
家有兩拳王—新一章節
家有兩拳王—進軍世界
家有兩拳王—拳王是這樣練成的
Eva@榮拳館其他文章

---