耶加達馬拉松即將起行(上)

Sam 2016-10-18

%e8%80%b6%e5%8a%a0%e9%81%94%e9%a6%ac%e6%8b%89%e6%9d%be-%e5%8d%b3%e5%b0%87%e8%b5%b7%e8%a1%8c%e4%b8%8a-1 香港跑友一提起印尼呢個國家，通常都會聯想起峇里島嘅陽光與海灘，有研究近代歷史嘅就會諗起1998年係當地嘅”黑色五月暴動” ；其實印尼都有馬拉松跑，除咗每年8月舉行嘅峇里島馬拉松外，仲有就係今次嘅主角，係印尼首都耶加達舉行嘅耶加達馬拉松。

耶加達馬拉松今年係第4年舉辦，由當地一間銀行-Mandiri冠名贊助，講歷史當然冇香港渣馬、CCM咁悠長，而香港跑友跑過呢場嘅印象中都係得果小貓三、四隻。點解我會跑呢場? 原因就係完成番上年係東南亞跑唔成全馬嘅心願，有大阪馬拉松就唔去抽，好揀唔揀，就走去報呢場。

只不過唔好諗住報咗名就安守自己本分，操吓長課就算，原來耶加達馬拉松已經仿傚歐洲嘅馬拉松比賽要求跑手出示醫生證明，先至可以拎號碼布參賽，呢樣已經比香港渣馬”先行一步”，只不過咁做好唔好，實屬見仁見智，因為見吓醫生，做下body check，要求醫生填下張醫生紙，呢度又涉及另一筆嘅費用，果筆錢夠報一、兩場本地賽，但嚟到最後階段，都焗住要俾錢人哋賺吓。

醫生證明，Google 番，其實同跑歐洲嘅馬拉松 “大同小異”

言歸正傳，講番耶加達馬拉松嘅賽道，由Monas 開跑，途徑市內多個重要地方，如Jakarta Kota , Cathedral Church , Istiqlal Mosque, Bundaran HI, Gelora Bung Karno，最後跑番Monas衝線，賽道丈量就有我哋熟悉嘅面孔，馮宏德幫手嘅。

“全馬” 賽道圖 (按圖放大)

----- 廣告 Ad -----

賽道丈量情況(轉載自大會Facebook Page)

至於小弟今次嘅戰衣，亦係特別預備嘅，件衫為馬來西亞運動品牌—ULTRON出品，係上年10月去大馬果陣係KL Sentral 嘅專門店購入，收埋咗一年先重見天日印嘢上去，衫上印有”教大告白 EdUHK Crushes” 嘅logo，同埋即將參加賽事嘅名同埋日期。 %e8%80%b6%e5%8a%a0%e9%81%94%e9%a6%ac%e6%8b%89%e6%9d%be-%e5%8d%b3%e5%b0%87%e8%b5%b7%e8%a1%8c%e4%b8%8a-5 “萬事俱備，只欠東風”，而家距離比賽日淨番五日，最後呢一個禮拜，就梗係休養生息，迎接大賽來臨。