新手行山 選擇路線4大備忘

新手去行山，遇到第一個難題，往往是「點樣去挑選一條行山路線呢？」不少人都有自己的行山喜好，不過大體而言，可依照以下4大方向，並非金科玉律，但值得參考：

1. 近屋企

香港差不多每一區都有幾座山，而呢啲山頭，大多數都有健身設備甚至晨運徑，唔識就搵個街坊問下。喺屋企附近行山嘅優點，係你一定會熟地頭，迷路嘅機會較低(因為你至少會認到地區地標)，而且又唔使逼車逼船。至於裝備方面，可以盡量輕巧簡單，唔使專登花錢添置新裝備住，等真係發覺自己愛上行山，先慢慢買啦。(見《[既方便又快捷] 11條藏於民居的行山徑》)

就咁睇相，你未必估到呢到係北角寶馬山。喺天后廟道行唔使半粒鐘，已經去到呢度。

----- 廣告 Ad -----

2. 諗個主題

最初行山，叫你漫無目的咁行一轉城門林道，相信唔少人都會覺得悶。正因為大家都鍾意行山有個主題，所以就人人話要上大東睇芒草，去白泥睇日落，或者去大棠睇紅葉。其實咁做都係人之常情，大家制訂行山路線嘅時間，亦不妨諗個主題，定個目標，咁就有個動力去行山嘞。(見《[行完食餐好] 5大海鮮團行山路線》、《2條大嶼山齋宴遊路線》)

三椏村嘅走地雞唔知可唔可以吸引到你行下山？

3. 解決交通問題

進出嘅交通會直接影響你行山心情。當你發現去龍脊嘅9號巴士要排長龍，或者萬宜東壩嘅的士100蚊位，咁就好容易搞到無癮，所以最初行山，不妨揀個進出方便嘅地點。其實唔少路線都好近市區，有啲搭港鐵到可以直達，真係方便到震。(見《[唔怕黑的] 港鐵直達之行山徑》)

行幾個鐘頭山，仲要諗點辦法返歸真係幾痛苦，圖為西灣亭。

4. 睇星星

唔係睇雙子座流星雨，係講緊每條路線嘅難度級別，越多星星就難行。咪睇輕呢啲星星，全都有根有據，自問自己係新手，就唔該揀一兩星。(見《[區區有山行] 18區行山徑一覽》)

最後提下大家，漁護署有個叫「郊野樂行」嘅網站，有齊全港咁多條官方山徑，全部都係廣闊大路，大家可以上去慢慢揀。

更多:
Fitz Facebook 專頁
[新手限定] 行山必要裝備與物資
行山初學者的3大秘訣
[有片] 保護郊野的4小步
Fitz Hiking 行山