[HNR沖繩環島跑] Day 6 美麗海水族館 > 恩納村

由

2018-05-24

Fitz > 運動 Sports > 跑步 Running > [HNR沖繩環島跑] Day 6 美麗海水族館 > 恩納村

Day6 – 54km 美麗海水族館 – 恩納村累積259km

6日變7日嘅環島計劃，聽日劃上完美句號。Day 6 係今次行程第二日 long day，54km 用左 7hours 完成 (包括4個 check point 休息、補給時間），好彩因爲天氣陰涼而變得跑得相對較輕鬆。

0km-23km

由美麗海出發，頭10k天氣陰涼，我最期待嘅畫面出現左「太陽伯怕收左…檔」，心入面無比暗爽，即刻「抓緊陰天的尾巴」，係佢重出江湖之前跑得幾多得幾多。可惜我唔係烈陽教主，都有暴斃嘅一日，跑完頭10k，轉入449路線返名護市途中，經過約5-6km地盤區，沙塵滾滾之餘，「陽光烈焰」同時間擊中我，即刻戰鬥力下降100%，身體話比我知好想停落黎，又曬到開始缺糖，好彩眼前出現左部汽水機救左一命。之後就直達名護市中心，經過前日住嘅地方，莫名其妙有種感動，咁快就兜左一圈。

23km-46km

接近中午十二點，太陽越黎越猛，再繼續烈陽神功嘅話相信會「伏屍街頭」。於是係27km位置入左休息區 – 許田道之駅 (道之駅對自駕遊朋友應該唔陌生，通常一大條公路中間總有幾個，入面包括：食堂、雪糕、市場、超市、紀念品等)。係到食左個超抵午餐 set，只不過係500Yen (約35hkd)，另外加100Yen叫左碗「回魂湯」，當跑到頹到相目放空時間，一碗熱湯可以即刻令成個人醒曬。27km午餐後繼續上路，但相腳已經開始崩緊，路都路想行，但同自己講，都只不過係爭一個半馬就完成今日Long Day，「老鏈」都抵埋佢! 跑到33km左右，個天終於可憐我曬左咁多日，天降甘露，係魚呀! 丫，係「雨」至岩!